ആലക്കോട്: ചപ്പാരപ്പടവ് പുഴയില്‍ ഒഴുക്കില്‍പെട്ട് വിദ്യാര്‍ഥിയെ കാണാതായി. ചെറുപാറ തട്ടുമ്മല്‍ സ്വദേശി ഗഫൂര്‍-ജമീല ദമ്പതികളുടെ മകന്‍ തസ്‌ലിമി(12)നെയാണ് ഇന്നലെ ഉച്ചക്ക് ഒരു മണിയോടെ കാണാതായത്. ചെറുപാറ തട്ടുമ്മലില്‍ നിന്നു ചപ്പാരപ്പടവ് ബദരിയ നഗറിലെ ബന്ധുവീട്ടില്‍ എത്തിയതായിരുന്നു തസ്‌ലിം. വീടിനോട് ചേര്‍ന്ന പുഴയില്‍ കൂട്ടുകാരുമൊത്ത് കുളിക്കുന്നതിനിടെ ഒഴുക്കില്‍പെടുകയായിരുന്നു. മറ്റൊരു വിദ്യാര്‍ഥി കൂടി ഒഴുക്കില്‍പെട്ടെങ്കിലും കൂടെയുണ്ടായിരുന്നവര്‍ രക്ഷപെടുത്തി. തളിപ്പറമ്പില്‍ നിന്നെത്തിയ ഫയര്‍ഫോഴ്‌സും പൊലിസും നാട്ടുകാരുടെ സഹായത്തോടെ തിരച്ചില്‍ നടത്തിയെങ്കിലും കുട്ടിയെ കണ്ടെത്താനായിട്ടില്ല. ശക്തമായ മഴ രക്ഷാപ്രവര്‍ത്തനങ്ങള്‍ക്ക് തടസമായതിനാല്‍ തിരച്ചില്‍ രാത്രിയോടെ അവസാനിപ്പിച്ചു. ഇന്ന് രാവിലെ തിരച്ചില്‍ പുനഃരാരംഭിക്കും.