മുംബൈ: പിന്‍വലിച്ച 1000 രൂപ നോട്ടിന് പകരം പുതിയ രൂപത്തില്‍ 1000 രൂപ ഇറക്കാന്‍ റിസര്‍വ് ബാങ്ക് തീരുമാനം. ഈ വര്‍ഷം ഡിസംബറോടെ പുതിയ നോട്ട് ബാങ്കുകളിലെത്തുമെന്നാണ് ആര്‍.ബി.ഐ അറിയിച്ചിട്ടുള്ളത്.
നോട്ടിന്റെ അച്ചടിക്കുള്ള എല്ലാ നടപടികളും തുടങ്ങിയിട്ടുണ്ട്. കര്‍ശനമായ സുരക്ഷാ മാനദണ്ഡങ്ങളുള്ള നോട്ടാണ് പുറത്തിറക്കുക. മൈസൂരുവിലെയും ബംഗാളിലെ സാല്‍ബോനിയിലുമുള്ള പ്രസുകളിലാണ് അച്ചടി നടക്കുകയെന്നാണ് വിവരം. ആറുമാസം മുന്‍പ് 2000 രൂപ നോട്ടിന്റെ അച്ചടി നിര്‍ത്തിയിരുന്നു. അതിന് പകരം 200 രൂപ നോട്ടുകള്‍ ഏതാനും ദിവസങ്ങള്‍ക്ക് മുന്‍പ് പുറത്തിറക്കുകയും ചെയ്തു.
നിലവില്‍ 1, 2, 5, 10, 20, 50, 100, 500, 2,000 നോട്ടുകളാണ് ഇടപാടുകള്‍ക്ക് ഉണ്ടായിരുന്നത്. ഇവയ്‌ക്കൊപ്പം കഴിഞ്ഞ ദിവസം 200 രൂപയും പുറത്തിറക്കിയിരുന്നു. ഇതിനു പിന്നാലെയാണ് പുതിയ രൂപത്തില്‍ വീണ്ടും 1000 രൂപ പുറത്തിറക്കാന്‍ തീരുമാനിച്ചത്.