കാണ്‍പൂര്‍: ഓക്‌സിജന്റെ അഭാവംമൂലം 73 കുട്ടികള്‍ മരിക്കാനിടയായ സംഭവത്തില്‍ ഗൊരഘ്പുര്‍ ബി.ആര്‍.ഡി മെഡിക്കല്‍ കോളജ് പ്രിന്‍സിപ്പാള്‍ രാജീവ് മിശ്ര, ഭാര്യ പൂര്‍ണിമ എന്നിവരെ പൊലിസ് അറസ്റ്റ് ചെയ്തു. ഇവരെ ഗൊരഖ്പുര്‍ പ്രത്യേക കോടതിയില്‍ ഹാജരാക്കി.

നേരത്തെ, ഇവരെ സ്ഥാനത്തു നിന്ന് സസ്‌പെന്റ് ചെയ്തിരുന്നു. ഇവരെക്കൂടാതെ ആശുപത്രിയിലെ മറ്റ് ആറു ജീവനക്കാര്‍, ഓക്‌സിജന്‍ വിതരണ ഏജന്‍സിയിലെ രണ്ടു പേര്‍ എന്നിവര്‍ക്കെതിരെയാണ് കേസെടുത്തിരിക്കുന്നത്.

ഓക്‌സിജന്‍ എത്തിക്കേണ്ട ഉത്തരവാദിത്തം നിറവേറ്റിയില്ലെന്നാണ് ഇവര്‍ക്കെതിരായ എഫ്.ഐ.ആറില്‍ പറയുന്നത്. കഴിഞ്ഞ സാമ്പത്തിക വര്‍ഷത്തില്‍ ആശുപത്രിക്ക് മൊത്തം 454 ലക്ഷം രൂപ കിട്ടിയെന്നും എന്നാല്‍ 63.65 ലക്ഷം രൂപ ഓക്‌സിജന്‍ വിതരണ ഏജന്‍സിക്ക് നല്‍കിയില്ലെന്നും എഫ്.ഐ.ആറില്‍ പറയുന്നു.