തൊടുപുഴ: ടി.എ നസീര്‍ രക്തസാക്ഷിദിനം ഇന്ന് തൊടുപുഴയില്‍ പ്രകടനം, പൊതുസമ്മേളനം എന്നിവയോടെ ആചരിക്കും. സി.പി.എം തൊടുപുഴ ഏരിയ കമ്മിറ്റിയുടെയും ഡി.വൈ.എഫ്.ഐ തൊടുപുഴ ബ്ലോക്ക് കമ്മിറ്റിയുടെയും സംയുക്താഭിമുഖ്യത്തിലാണ് ദിനാചരണം.
രാവിലെ 9.30ന് നസീര്‍ വെട്ടേറ്റുവീണ കീരികോട്ട് സ്മൃതികുടീരത്തില്‍ സി.പി.എം പതാക ഏരിയ സെക്രടറി മുഹമ്മദ് ഫൈസലും ഡി.വൈ.എഫ്.ഐ പതാക ജില്ലാ സെക്രട്ടറി നിശാന്ത് വി. ചന്ദ്രനും ഉയര്‍ത്തും. തുടര്‍ന്ന് പ്രവര്‍ത്തകര്‍ പുഷ്പാര്‍ച്ചന നടത്തും. സി.പി.എം തൊടുപുഴ ഏരിയ കമ്മിറ്റിയംഗവും ഡി.വൈ.എഫ്.ഐ ജില്ലാ വൈസ് പ്രസിഡന്റും തൊടുപുഴ ബ്ലോക്ക് സെക്രട്ടറിയുമായിരുന്ന നസീര്‍ 1989 ഓഗസ്റ്റ് 30നാണ് കൊല്ലപ്പെട്ടത്. ഭാരത്ബന്ദ് ദിനത്തിലാണ് സംഭവം.
വൈകിട്ട് 4.30ന് മങ്ങാട്ടുകവലയില്‍നിന്ന് പ്രകടനം ആരംഭിക്കും. തൊടുപുഴ മുനിസിപ്പല്‍ മൈതാനത്താണ് ചേരുന്ന അനുസ്മരണസമ്മേളനം സി.പി.എം കണ്ണൂര്‍ ജില്ലാ സെക്രട്ടറി പി. ജയരാജന്‍ ഉദ്ഘാടനം ചെയ്യും. പാര്‍ട്ടി ജില്ലാ സെക്രട്ടറി കെ.കെ ജയചന്ദ്രന്‍, സംസ്ഥാന കമ്മിറ്റിയംഗം കെ.പി മേരി, ജില്ലാ സെക്രട്ടറിയറ്റംഗങ്ങളായ സി.വി വര്‍ഗീസ്, വി.വി മത്തായി സംസാരിക്കും.