കൊല്ലം: സ്വാശ്രയ മെഡിക്കല്‍ കോളജ് വിഷയത്തില്‍ സംസ്ഥാന സര്‍ക്കാരിനും ആരോഗ്യ വകുപ്പിനും തെല്ലും വീഴ്ച്ച സംഭവിച്ചിട്ടെന്ന് ആരോഗ്യ മന്ത്രി കെ.കെ ശൈലജ. നീണ്ടകര താലൂക്ക് ആശുപത്രിയിലെ പുതിയ കെട്ടിടത്തിന്റെയും ഡയാലിസിസ് സെന്ററിന്റെയും ഉദ്ഘാടനം നിര്‍വഹിക്കുകയായിരുന്നു മന്ത്രി. മാനേജ്‌മെന്റുകള്‍ക്ക് അനുകൂലമായ കോടതി വിധി പൊതുസമൂഹത്തിന് വലിയ പ്രഹരമാണ്. കോടതിയില്‍ തന്നെ അപ്പീല്‍ സമര്‍പ്പിക്കുകയല്ലാതെ സര്‍ക്കാരിന് മറ്റൊന്നും ചെയ്യാനാവില്ല. കാര്യങ്ങള്‍ പാടേ അവഗണിച്ച് സര്‍ക്കാരിന് വീഴ്ച്ചപറ്റിയെന്ന രീതിയില്‍ നടത്തുന്ന പ്രചാരണങ്ങള്‍ക്ക് നീതികരണമില്ലെന്ന് മന്ത്രി ചൂണ്ടിക്കാട്ടി.
തീരദേശത്ത് മത്സ്യത്തൊഴിലാളികള്‍ ഉള്‍പ്പെടെ അനേകം പേര്‍ ആശ്രയിക്കുന്ന നീണ്ടകര താലൂക്ക് ആശുപത്രിയുടെ വികസനത്തിന് ജനപ്രതിനിധികള്‍ മുന്‍കൈ എടുത്ത് മാസ്റ്റര്‍പ്ലാന്‍ തയ്യാറാക്കി നല്‍കിയാല്‍ ഫണ്ട് കണ്ടെത്താന്‍ ശ്രമിക്കാമെന്ന് മന്ത്രി പറഞ്ഞു. നീണ്ടകരയുടെ പ്രത്യേക സാഹചര്യം ചൂണ്ടിക്കാട്ടി തസ്തിക സൃഷ്ടിക്കുന്നതിനുള്ള സാധ്യതയും ആരായാവുന്നതാണ്. മൂന്നു വര്‍ഷംകൊണ്ട് ആശുപത്രിയെ കൂടുതല്‍ മെച്ചപ്പെട്ട നിലയിലാക്കാനാകുമെന്നും മന്ത്രി ചൂണ്ടിക്കാട്ടി.
എന്‍. വിജയന്‍പിള്ള എം.എല്‍.എ അധ്യക്ഷനായി. ബ്ലോക്ക് പഞ്ചായത്ത് പ്രസിഡന്റ് കെ തങ്കമണിപ്പിള്ള, ഗ്രാമപഞ്ചായത്ത് പ്രസിഡന്റുമാരായ മായാവിമലാ പ്രസാദ്, പി അനില്‍കുമാര്‍, ജോസ് ആന്റണി, കെ.എ നിയാസ്, ബ്ലോക്ക് പഞ്ചായത്ത് സ്റ്റാന്റിങ് കമ്മിറ്റി അധ്യക്ഷരായ ബിന്ദു കൃഷ്ണകുമാര്‍, പി വിജയകുമാര്‍, കോയിവിള സൈമണ്‍, ഗ്രാമ പഞ്ചായത്ത് വൈസ് പ്രസിഡന്റ് വസന്തകുമാര്‍, മറ്റ് ജനപ്രതിനിധികള്‍, ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.