ഫ്‌ളോറിഡ: മകന്റെ ഭാര്യയെ അച്ചടക്കം പഠിപ്പിക്കാനും ശിക്ഷിക്കാനുമായി ഇന്ത്യന്‍ വൃദ്ധദമ്പതിമാര്‍ പറന്നത് 13,000 കി.മീറ്റര്‍ ദൂരം. പഞ്ചാബ് സ്വദേശികളായ ജസ്ബീര്‍ കല്‍സി(67), ഭാര്യ ഭൂപീന്ദര്‍(62) എന്നിവരാണ് സംസ്ഥാനത്തെ ഹില്‍സ്ബറോ കൗണ്ടിയില്‍നിന്ന് മകന്‍ ദേവ്ബീറിന്റെ ഭാര്യയെ അച്ചടക്കം പഠിപ്പിക്കാനും ഉപദേശിക്കാനുമായി ഫ്‌ളോറിഡയിലേക്കു വിമാനം കയറിയത്.
ഫ്‌ളോറിഡയില്‍ താമസമാക്കിയ ദേവ്ബീറിന്റെ ഭാര്യ സില്‍ക്കി ഗെയ്ന്തിനെ(33) ശരീരത്തില്‍ മാരകമായ പരുക്കുകളോടെ പൊലിസ് കണ്ടെത്തുകയായിരുന്നു. സംഭവത്തെ തുടര്‍ന്ന് ദമ്പതികളെയും മകനെയും പൊലിസ് അറസ്റ്റ് ചെയ്തിട്ടുണ്ട്.
ഇവര്‍ക്കെതിരേ ദേഹത്തില്‍ മുറിവേല്‍പ്പിക്കലടക്കം നിരവധി കേസുകളാണു ചുമത്തിയിട്ടുള്ളത്. ഗെയ്ന്ത് ഇന്ത്യയിലുള്ള മാതാപിതാക്കളെ വിവരമറിയിച്ചതിനെ തുടര്‍ന്നാണ് പൊലിസെത്തി കുടുംബത്തെ അറസ്റ്റ് ചെയ്തത്.
ദേവ്ബീര്‍ യുവതിയെ നിരന്തരമായി പീഡിപ്പിക്കാറുള്ളതായി യുവതി പൊലിസിനോട് പറഞ്ഞു. മകളെ ശിക്ഷിക്കാനായി ഫ്‌ളോറിഡയിലെത്താന്‍ ഇയാള്‍ മാതാപിതാക്കളെ വിളിക്കാറുള്ളതായും പരാതിയില്‍ പറയുന്നു.
തുടര്‍ന്ന് ഫ്‌ളോറിഡയിലെ മകന്റെ വീട്ടിലെത്തിയ ദമ്പതികള്‍ യുവതിയെ ക്രൂരമായി മര്‍ദിക്കുകയും ജസ്ബീര്‍ യുവതിയുടെ കഴുത്തിനുനേരെ കത്തി ചൂണ്ടിക്കാണിച്ച് ഭീഷണി മുഴക്കിയതായും പരാതിയുണ്ട്.