കയ്പമംഗലം: ശ്രീനാരായണപുരത്ത് വീട്ടില്‍ നിന്നും മദ്യക്കുപ്പിയില്‍ ഒട്ടിക്കാനുള്ള ലേബലുകളും അനധികൃത മദ്യവും കണ്ടെടുത്ത കേസില്‍ പ്രതികളെ കസ്റ്റഡിയില്‍ എടുക്കുന്നത് തടഞ്ഞ സംഭവത്തില്‍ ഒരാള്‍ അറസ്റ്റില്‍. പത്ത് പേര്‍ക്കെതിരെ പൊലിസ് കേസെടുത്തു. ശ്രീനാരായണപുരം സ്വദേശി തെക്കൂട്ടു കാരയില്‍ വീട്ടില്‍ മണിലാലിനെയാണ്(35) മതിലകം പൊലിസ് അറസ്റ്റ് ചെയ്തത്. എക്‌സ്സൈസ് ഉദ്യോഗസ്ഥരുടെ ജോലി തടസ്സപ്പെടുത്തല്‍, കൈയേറ്റം ചെയ്യല്‍, അസഭ്യം പറയല്‍ തുടങ്ങിയ കുറ്റ കൃത്യങ്ങള്‍ക്കെതിരെയാണ് പത്ത് പേര്‍ക്കെതിരെ പൊലിസ് കേസ് എടുത്തത്.
ചൊവ്വാഴ്ച ഉച്ചയോടെയായിരുന്നു കേസിനാസ്പദമായ സംഭവം. ശ്രീനാരായണപുരം സെന്ററിന് പടിഞ്ഞാറു ഭാഗത്തുള്ള രണ്ടു വീടുകളില്‍ നിന്നാണ് മദ്യക്കുപ്പിയില്‍ ഒട്ടിക്കാനുള്ള ലേബലുകളും കാലിക്കുപ്പികളും അനധികൃത മദ്യവും എക്‌സ്സൈസ് അധികൃതര്‍ കണ്ടെടുത്തത്. പക്ഷേ പ്രതികളെ ജീപ്പില്‍ അറസ്റ്റ് ചെയ്തു കൊണ്ട് പോകാന്‍ ശ്രമിച്ചെങ്കിലും നാട്ടുകാര്‍ സംഘടിച്ചു തടയുകയായിരുന്നു. ഇതിനെ തുടര്‍ന്ന് അറസ്റ്റ് ചെയ്യാനുള്ള ശ്രമം ഉപേക്ഷിച്ച് എക്‌സ്സൈസ് ഉദ്യോഗസ്ഥര്‍ മടങ്ങുകയായിരുന്നു. ഇതേ സമയം അനധികൃത മദ്യം കണ്ടെത്തിയ സംഭവത്തില്‍ പ്രതികളെ കണ്ടെത്താന്‍ എക്‌സ്സൈസ് ശ്രീനാരായണപുരം മേഖലയില്‍ പരിശോധന വ്യാപകമാക്കിയിട്ടുണ്ട്.