ലണ്ടന്‍: ഇംഗ്ലണ്ടിനെതിരായ മൂന്നാം ക്രിക്കറ്റ് ടെസ്റ്റില്‍ തകര്‍ന്നടിഞ്ഞ് വെസ്റ്റിന്‍ഡീസ്. ടോസ് നേടി ബാറ്റിങ് തിരഞ്ഞെടുത്ത വിന്‍ഡീസിന്റെ ഒന്നാം ഇന്നിങ്‌സ് വെറും 123 റണ്‍സില്‍ അവസാനിച്ചു. ആറ് വിക്കറ്റുകള്‍ വീഴ്ത്തി ഓള്‍ റൗണ്ടര്‍ ബെന്‍ സ്റ്റോക്‌സ് കൊടുങ്കാറ്റായപ്പോള്‍ കരീബിയന്‍ ബാറ്റിങ് നിര കടപുഴകി വീണു. 39 റണ്‍സെടുത്ത കീരന്‍ പവലാണ് ടോപ് സ്‌കോറര്‍. ഷെയ് ഹോപ് 29 റണ്‍സ് കണ്ടെത്തി. മറ്റൊരാള്‍ക്കും കാര്യമായി പിടിച്ചു നില്‍ക്കാന്‍ സാധിച്ചില്ല. മൂന്ന് താരങ്ങള്‍ സംപൂജ്യരായി കൂടാരം കയറിയപ്പോള്‍ രണ്ട് പേര്‍ ഒറ്റ റണ്ണില്‍ പുറത്തായി.
ടെസ്റ്റ് കരിയറിലെ ഏറ്റവും മികച്ച ബൗളിങ് പ്രകടനമാണ് സ്റ്റോക്‌സ് പുറത്തെടുത്തത്. 14.3 ഓവറില്‍ ആറ് മെയ്ഡനടക്കം വെറും 22 റണ്‍സ് മാത്രം വഴങ്ങിയാണ് താരത്തിന്റെ ആറ് വിക്കറ്റ് പ്രകടനം. ആന്‍ഡേഴ്‌സന്‍, റോളണ്ട് ജോണ്‍സ് എന്നിവര്‍ രണ്ട് വീതം വിക്കറ്റുകള്‍ വീഴ്ത്തി വിന്‍ഡീസ് ചെറുത്ത് നില്‍പ്പ് അവസാനിപ്പിക്കുകയും ചെയ്തു.