ദമാം: ലക്ഷങ്ങള്‍ മുടക്കി പുതിയ വിസ നേടി ജോലിക്കെത്തിയ മലയാളികള്‍ മാസങ്ങളായി ശമ്പളം ലഭിക്കാതെ ദുരിതത്തില്‍. കിഴക്കന്‍ സഊദിയിലെ നിര്‍മാണ സ്ഥാപനത്തിലേക്കു തൊഴില്‍വിസകളില്‍ വന്ന മലയാളികളാണ് അഞ്ചുമാസമായി ശമ്പളം ലഭിക്കാതെ ദുരിതത്തില്‍ കഴിയുന്നത്. പത്തുമാസം മുന്‍പ് പുതിയ വിസകളില്‍ എത്തിയ ഇവര്‍ക്ക് ആകെ ലഭിച്ചത് രണ്ടുമാസത്തെ ശമ്പളം മാത്രമാണ്. ശമ്പളം നല്‍കുന്നില്ലെന്നു മാത്രമല്ല ഭക്ഷണത്തിനുള്ള സൗകര്യം പോലുമില്ലാതെയാണ് ഇവര്‍ ഇവിടെ കഴിയുന്നത്.
ഒരു ലക്ഷം രൂപ നല്‍കിയാണ് ഇവര്‍ സ്വകാര്യ ട്രാവല്‍സ് മുഖേന ഇവിടെയെത്തിയത്. ജോലി തുടങ്ങി മാസം പിന്നിട്ടപ്പോള്‍ ശമ്പളം ആവശ്യപ്പെട്ട ഇവര്‍ക്കു നേരത്തെ വാഗ്ദാനം ചെയ്ത തുക ലഭിച്ചില്ല. തുടര്‍ന്ന് ശമ്പളം തീരെ ലഭിക്കാതായി.
അഞ്ചു മാസമായി ശമ്പളം ലഭിക്കാത്തതിനെ തുടര്‍ന്നു ഭക്ഷണത്തിനുള്ള പണം പോലും കൈവശമില്ലാതെ കഷ്ടപ്പെടുകയാണ് ഇവര്‍. തൊഴില്‍കരാര്‍ പോലുമില്ലാതെയാണ് ഇവരില്‍ പലരും ഇവിടെ തൊഴിലിനെത്തിയത്. ശമ്പളം ലഭിക്കാതെ ദുരിതമായതോടെ വിസ തരപ്പെടുത്തി കൊണ്ടുവന്ന ട്രാവല്‍ ഏജന്റിനെ ബന്ധപ്പെട്ടെങ്കിലും ഇവര്‍ കൈമലര്‍ത്തുകയായിരുന്നുവെന്നു തൊഴിലാളികള്‍ പറഞ്ഞു.