ദുബൈ: ദുബൈയിലെ താമസകെട്ടിടങ്ങളുടെ വാടക വ്യക്തമാക്കുന്ന സാര്‍ട്ട് റെന്റല്‍ ഇന്റക്‌സ് പുറത്തിറക്കി. കെട്ടിടങ്ങളുടെ വാടക നിരക്ക് മാത്രമല്ല വാടകക്ക് എടുക്കുന്നവര്‍ വാടക നല്കുന്നതില്‍ വീഴ്ചവരുത്തുന്നവരാണോ
എന്നു കണ്ടെത്താനും പുതിയ സ്മാര്‍ട്ട് സംവിധാനത്തിനു സാധിക്കും. ദുബൈ ലാന്‍ഡ് ഡിപ്പാര്‍ട്ടുമെന്റാണ് പുതിയ സ്മാര്‍ട്ട് റെന്റല്‍ ഇന്റക്‌സ് അവതരിപ്പിച്ചിരിക്കുന്നത്. 

റിയല്‍ എസ്റ്റേറ്റ് രംഗത്തെ പ്രവര്‍ത്തനങ്ങള്‍ സുതാര്യമാക്കാന്‍ ലക്ഷ്യമിട്ടു കൊണ്ടാണ് സ്മാര്‍ട്ട് ഇന്റക്‌സ് സംവിധാനം പുറത്തിറക്കിയതെന്ന് അധികൃതര്‍ പറഞ്ഞു. കെട്ടിട ഉടമകള്‍, വാടകക്കാര്‍ തുടങ്ങി റിയല്‍ എസ്റ്റേറ്റ് രംഗത്ത് പ്രവര്‍ത്തിക്കുന്നവര്‍ക്ക് ഉപകാരപ്പെടുന്നതാണ് സ്മാര്‍ട്ട് സംവിധാനമെന്ന് അധികൃതര്‍ വാര്‍ത്താസമ്മേളനത്തില്‍ അറിയിച്ചു. 

ദുബൈ നഗരത്തിലെ ഓരോ മേഖലയിലെയും കെട്ടിടങ്ങളുടെ വാടക നിരക്കുകള്‍ അവയുടെ സൗകര്യങ്ങള്‍, ഗുണമേന്മ, ഉപയോഗക്ഷമത തുടങ്ങിയവയുടെ അടിസ്ഥാനത്തില്‍ തരംതിരിച്ചിക്കുന്നു. ഈ സൂചിക ഉപയോക്താക്കള്‍ക്ക് വിവിധ മേഖലകളിലെ വാടക നിരക്കുകള്‍ മനസ്സിലാക്കാനും അവര്‍ക്കു അനുയോജ്യമായ സ്ഥലങ്ങള്‍ തിരഞ്ഞെടുക്കാനും സഹായകരമാകും.

മോഡല്‍ ടെനന്റ് ക്ലാസിഫിക്കേഷന്‍ സംവിധാനത്തിലൂടെ വാടകക്കാര്‍ക്ക് മുമ്പ് വാടക കരാറുകളില്‍ വീഴ്ചവരുത്തിയവരാണ് എന്നതും വാടക അടക്കുന്നതില്‍ പ്രശ്‌നങ്ങള്‍ നേരിട്ടിട്ടുണ്ടോ എന്നതും കെട്ടിട ഉടമകള്‍ക്ക് അറിയാന്‍ കഴിയും. ഇത് ഇജാരി ക്രെഡിറ്റ് റേറ്റിങ് സിസ്റ്റത്തിന്റെ സഹായത്തോടെയാണ് സാധ്യമാക്കുന്നത്.

ഓരോ കെട്ടിടത്തിനും ഇന്റക്‌സില്‍ നല്‍കിയിരിക്കുന്ന റേറ്റിങ് അനുസരിച്ചായിരിക്കും വാടക വര്‍ദ്ധനവിനുള്ള പരിധി നിശ്ചയിക്കുക. കെട്ടിട ഉടമകള്‍ക്ക് ഈ മാനദണ്ഡങ്ങള്‍ പാലിച്ചായിരിക്കും വാടക വര്‍ദ്ധിപ്പിക്കാന്‍ കഴിയുക. വാടകക്കാര്‍ക്ക് ഈ സൂചിക പരിശോധിച്ച് നിയമാനുസൃതമായ വാടക നിരക്കുകള്‍ ഉറപ്പുവരുത്താനാകും.