കൊച്ചി: കേരള ബ്ലാസ്റ്റേഴ്‌സ് സൂപ്പർതാരം പ്രബീർ ദാസ് ഈ സീസണിൽ ബാക്കിയുള്ള മത്സരങ്ങളിൽ മുംബൈ സിറ്റി എഫ്സിഖ് വേണ്ടി ബൂട്ട് കെട്ടും. കേരള ബ്ലാസ്റ്റേഴ്സിൽ നിന്നും ലോണിലാണ് താരം മുംബൈക്ക് വേണ്ടി കളിക്കുക. ഇന്ത്യൻ സൂപ്പർ ലീഗിന്റെ ഈ സീസണിൽ ഒരു മത്സരത്തിൽ മാത്രമേ പ്രബീർ ദാസ് കേരളത്തിനായി കളത്തിലിറങ്ങിയിട്ടുള്ളൂ. 

2023-24 സീസണിലാണ് പ്രബീർ ദാസ് കേരളത്തിലെത്തിയത്. ബെംഗളൂരു എഫ്‌സിയിൽ നിന്നും ഫ്രീ ട്രാൻസ്ഫറിലാണ് താരം കേരള ബ്ലാസ്റ്റേഴ്സിൽ എത്തിയത്. ബ്ലാസ്റ്റേഴ്‌സിനൊപ്പമുള്ള തൻ്റെ ആദ്യ സീസണിൽ എട്ട് മത്സരങ്ങളിലാണ് പ്രബീർ ദാസ് കളത്തിലിറങ്ങിയത്. ഇന്ത്യൻ സൂപ്പർ ലീഗിൽ അത്‌ലറ്റിക്കോ ഡി കൊൽക്കത്തയ്‌ക്കൊപ്പം രണ്ട് ഐഎസ്എൽ കിരീടങ്ങളും, മോഹൻ ബഗാനൊപ്പം ഐ-ലീഗും ഫെഡറേഷൻ കപ്പും, ബെംഗളൂരു എഫ്‌സിക്കൊപ്പം ഡ്യൂറൻഡ് കപ്പും പ്രബീർ ദാസ് നേടിയിട്ടുണ്ട്.

ഈ സീസണിൽ കേരള ബ്ലാസ്റ്റേഴ്‌സ് നിരാശാജനകമായ പ്രകടനമാണ് ലീഗിൽ കാഴ്ചവെച്ചുകൊണ്ടിരിക്കുന്നത്. ഇതിനോടകം തന്നെ 14 മത്സരങ്ങൾ പിന്നിട്ടപ്പോൾ വെറും നാല് മത്സരങ്ങളിൽ മാത്രമാണ് കേരളത്തിന് വിജയിക്കാൻ സാധിച്ചത്. രണ്ട് മത്സരങ്ങൾ സമനിലയിൽ പിരിഞ്ഞപ്പോൾ എട്ട് മത്സരങ്ങൾ പരാജയപ്പെടുകയും ചെയ്തു. ഈ മോശം പ്രകടനങ്ങൾക്ക് പിന്നാലെ ടീമിന്റെ മുഖ്യ പരിശീലകൻ മൈക്കൽ സ്റ്റാറെയെ ടീം പുറത്താക്കിയിരുന്നു.