മണ്ണാര്‍ക്കാട്: സ്വകാര്യ ആസ്പത്രിയില്‍ പ്രവേശിപ്പിച്ച കൈകുഞ്ഞിന് ചികിത്സ വൈകിച്ചതായി പരാതി. സംഭവവുമായി ബന്ധപ്പെട്ട് ചൈല്‍ഡ് ലൈന്‍ അധികൃതര്‍ അന്വേഷണം തുടങ്ങി. കുമരംപുത്തൂര്‍ അരിയൂരിലെ മാമ്പറ്റ വീട്ടില്‍ സറഫുദ്ദീന്‍ - റജീന ദമ്പതികളുടെ ഏഴ് മാസം പ്രായമായ പെണ്‍കുഞ്ഞിനാണ് ദുരാനുഭവം.
വട്ടമ്പലത്തെ സ്വകാര്യ ആസ്പത്രിയില്‍ കഴിഞ്ഞ വ്യാഴാഴ്ചയാണ് സംഭവം. രാവിലെ 7.30ഓടെ ആസ്പത്രിയില്‍ എത്തിച്ച കുഞ്ഞിനെ വൈകുന്നേരം 3.30വരെയായിട്ടും യാതൊരു ചികിത്സയും നല്‍കിയില്ലന്നാണ് പരാതി. സംഭവവുമായി ബന്ധപ്പെട്ട് ചൈല്‍ഡ് ലൈന്‍, മുഖ്യമന്ത്രി, ആരോഗ്യ വകുപ്പ് മന്ത്രി, പൊലീസ്, വനിത ശിശുക്ഷേമം, ജില്ലാ മെഡിക്കല്‍ ഓഫീസര്‍, ആരോഗ്യ വകുപ്പ് സെക്രട്ടറി എന്നിവര്‍ക്ക് പരാതി നല്‍കിയതായി കുഞ്ഞിന്റെ പിതാവ് സറഫുദ്ദീന്‍ പറഞ്ഞു. കുഞ്ഞിനെ പിന്നീട് പെരിന്തല്‍മണ്ണയിലെ ഡോക്ടറുടെ ചികിത്സ നടത്തി. എന്നാല്‍ സംഭവവുമായി ബന്ധപ്പെട്ട് ആസ്പത്രി അധികൃതര്‍ പറയുന്നത് ഇങ്ങനെ: രാവിലെ 8മണിയോടെ ആസ്പത്രിയിലെത്തിയ കുഞ്ഞിന് പ്രാഥമികമായി നല്‍കേണ്ട ചികിത്സ നല്‍കിയിട്ടുണ്ടെന്നും, തുടയെല്ല് പൊട്ടിയതിനാല്‍ സി.എം.ആര്‍ സംവിധാനമുപയോഗിച്ച് മികച്ച ചകിത്സ നല്‍കാന്‍ ഡോക്ടര്‍മാര്‍ തയ്യാറെടുക്കുന്നതിനിടെ കുഞ്ഞിനെയും കൊണ്ട് രക്ഷിതാക്കള്‍ പോവുകയായിരുന്നുവെന്നുമാണ് അധികൃതരുടെ വിശദീകരണം.