ന്യൂഡല്‍ഹി: പൗരത്വ നിയമ ഭേദഗതി പ്രബല്യത്തിലാക്കിയതിന് പിന്നാലെ മുസ്‌ലിം ഭൂരിപക്ഷ പ്രദേശങ്ങളില്‍ രഹസ്യനിരീക്ഷണം ശക്തമാക്കി പൊലിസ്. മുസ്‌ലിംകള്‍ കൂടുതല്‍ താമസിക്കുന്ന മേഖലകളില്‍ പ്രത്യേക നീരിക്ഷണമാണ് ഏര്‍പ്പെടുത്തിയിരിക്കുന്നത്. മുഴുസമയവും പൊലിസ് പ്രദേശങ്ങളില്‍ ക്യാമ്പ് ചെയ്യുകയാണ്.

ഡല്‍ഹി, ബീഹാര്‍, അസം, ഉത്തര്‍പ്രദേശ് തുടങ്ങി സംസ്ഥാനങ്ങളിലാണ് നിരീക്ഷണം. സുരക്ഷയുടെ പേരില്‍ കേന്ദ്രസേന ഉള്‍പ്പെടെ പ്രത്യേക സംഘത്തെ വിന്യസിച്ചിട്ടുണ്ട്. സിഎഎ വിരുദ്ധ പ്രക്ഷോഭ സാധ്യതയുള്ള മേഖലകളില്‍ കൂടുതല്‍ ശ്രദ്ധവേണമെന്ന് ആഭ്യന്തരമന്ത്രാലയം നിര്‍ദേശം നല്‍കിയിട്ടുണ്ട്. നേരത്തെ നിയമത്തിനെതിരെ ഡല്‍ഹിയിലെ പ്രധാന പ്രതിഷേധ കേന്ദ്രമായിരുന്ന ഷഹീന്‍ബാഗില്‍ കേന്ദ്രസേനയെ ആണ് വിന്യസിച്ചിട്ടുള്ളത്. 500 പേരെ വിന്യസിച്ചു എന്നാണ് റിപ്പോര്‍ട്ടുകള്‍ പറയുന്നത്. പ്രദേശത്ത് വാഹനങ്ങള്‍ ഉള്‍പ്പെടെ പരിശോധിക്കുന്നുണ്ട്. കൂടാതെ പ്രധാന സര്‍വകലാശാലകള്‍, മാളുകള്‍, മാര്‍ക്കറ്റുകള്‍, ആരാധനാലയങ്ങള്‍ തുടങ്ങിയവക്ക് സമീപവും വന്‍ പൊലിസ് സന്നാഹമുണ്ട്. 

ബംഗാള്‍  ബിഹാര്‍ അതിര്‍ത്തിയിലെ മുസ്‌ലിം ഭൂരിപക്ഷമുള്ള സീമാഞ്ചല്‍ മേഖലയില്‍ പൊലീസ് മുന്‍കരുതല്‍ നടപടികള്‍ കര്‍ശനമാക്കി. അസമില്‍ പ്രതിഷേധം തുടരുന്നതിനാല്‍ വിവിധ ഇടങ്ങളില്‍ നിരോധനാജ്ഞ പ്രഖ്യാപിച്ചിട്ടുണ്ട്. പ്രതിഷേധം ഉയരാന്‍ സാധ്യതയുള്ള യുപിയിലെ മേഖലകളിലും സുരക്ഷയുണ്ട്.

പൗരത്വ നിയമം പ്രബല്യത്തിലായതിനു പിന്നാലെ രാജ്യവ്യാപക പ്രതിഷേധമാണ് നടക്കുന്നത്. 2019ല്‍ 100 ദിവസത്തിലധികമാണ് ഷഹീന്‍ബാഗില്‍ സമരം നടന്നത്. സ്ത്രീകളും കുട്ടികളും വയോധികരും രാപകല്‍ റോഡില്‍ കുത്തിയിരുന്ന് പ്രതിഷേധിച്ചിരുന്നു. ലോക ശ്രദ്ധ നേടിയ സമരങ്ങളായിരുന്നു അത്.