ലണ്ടന്‍: സീസണിലെ യുവേഫ ചാംപ്യന്‍സ് ലീഗ് പോരാട്ടങ്ങള്‍ക്ക് ഇന്ന് കിക്കോഫ്. ഗ്രൂപ്പ് ഘട്ടത്തിലെ ഒന്നാം റൗണ്ട് മത്സരങ്ങള്‍ക്കാണ് ഇന്ന് തുടക്കമാകുന്നത്. നെയ്മറിനെ പൊന്നും വിലയ്ക്ക് സ്വന്തമാക്കി പാരിസ് സെന്റ് ജെര്‍മെയ്‌നടക്കമുള്ള ടീമുകള്‍ രണ്ടും കല്‍പ്പിച്ചിറങ്ങുന്നത് ചാംപ്യന്‍സ് ലീഗിലെ മികച്ച മുന്നേറ്റം ലക്ഷ്യമിട്ടാണ്. കഴിഞ്ഞ കുറച്ച് വര്‍ഷങ്ങളായി സ്പാനിഷ് വമ്പന്‍മാരായ റയല്‍ മാഡ്രിഡിന്റേയും ബാഴ്‌സലോണയുടേയും അപ്രമാദിത്വമാണ് ചാംപ്യന്‍സ് ലീഗിന്റെ ഹൈ ലൈറ്റ്.
ആ പതിവ് ഇത്തവണ തെറ്റിക്കുകയാണ് പി.എസ്.ജി അടക്കമുള്ള യൂറോപ്യന്‍ ടീമുകളുടെ പ്രഥമ അജണ്ട. യൂറോപ്പിലെ മറ്റ് വമ്പന്‍ ടീമുകള്‍ക്ക് തലവേദനയാകാന്‍ പോകുന്നത് പി.എസ്.ജി തന്നെയാകും എന്ന കാര്യത്തില്‍ തര്‍ക്കമില്ല. മൊണാക്കോയെ കഴിഞ്ഞ സീസണില്‍ ഫ്രഞ്ച് ലീഗ് വണ്‍ കിരീടത്തിലേക്ക് നയിച്ച യുവ താരം കെയ്‌ലിയന്‍ എംബാപ്പെയെ വായ്പാടിസ്ഥാനത്തില്‍ ടീമിലെത്തിച്ച പി.എസ്.ജി കരുത്തുറ്റ മുന്നേറ്റത്തെയാണ് സൃഷ്ടിച്ചിരിക്കുന്നത്.
നെയ്മര്‍- കവാനി- എംബാപ്പെ ത്രയമാണ് നിലവില്‍ ശ്രദ്ധേയമായി നില്‍ക്കുന്ന മുന്നേറ്റം. പി.എസ്.ജിക്കൊപ്പം റൊമേലു ലുകാകുവിന്റെ മുന്നേറ്റത്തില്‍ വിശ്വാസമര്‍പ്പിച്ച് കഴിഞ്ഞ സീസണില്‍ പുറത്തിരുന്ന മാഞ്ചസ്റ്റര്‍ യുനൈറ്റഡും ഇത്തവണ കളത്തിലുണ്ട്.
ചാംപ്യന്‍സ് ലീഗിന്റെ 2014-15 സീസണില്‍ ഫൈനല്‍ കളിച്ച ബാഴ്‌സലോണയും യുവന്റസും ഇത്തവണ ഗ്രൂപ്പിലെ ആദ്യ മത്സരത്തില്‍ തന്നെ നേര്‍ക്കുനേര്‍ വരുന്നതാണ് ഇത്തവണത്തെ ശ്രദ്ധേയമായ കാര്യം. ഇന്ന് ബാഴ്‌സയുടെ തട്ടകത്തിലാണ് മത്സരം അരങ്ങേറുന്നത്. ഇംഗ്ലീഷ് ചാംപ്യന്‍മാരായ ചെല്‍സി- അസര്‍ബൈജാന്‍ ടീം ഖരബഗുമായും ബയേണ്‍ മ്യൂണിക്ക്- ആന്റര്‍ലെറ്റുമായും പി.എസ്.ജി- സെല്‍റ്റിക്കുമായും മാഞ്ചസ്റ്റര്‍ യുനൈറ്റഡ്- ബാസലുമായും ഏറ്റുമുട്ടും. ഇറ്റാലിയന്‍ കരുത്തരായ റോമയും സ്പാനിഷ് വമ്പന്‍മാരായ അത്‌ലറ്റിക്കോ മാഡ്രിഡും തമ്മിലുള്ളതാണ് മറ്റൊരു ശ്രദ്ധേയ പോരാട്ടം. ഒളിംപ്യാകോസ്- സ്‌പോര്‍ടിങ്, ബെന്‍ഫിക്ക- സി.എസ്.കെ.എ മോസ്‌കോ പോരാട്ടവും ഇന്ന് നടക്കും.