റാവൽപിണ്ടി: ഐസിസി ചാമ്പ്യൻസ് ട്രോഫിയിൽ ബംഗ്ലാദേശിനെ അഞ്ചു വിക്കറ്റുകൾക്ക് കീഴടക്കി ന്യൂസിലാൻഡ് സെമി ഫൈനലിലേക്ക് മുന്നേറി. റാവൽപിണ്ടി സ്റ്റേഡിയത്തിൽ നടന്ന മത്സരത്തിൽ ആദ്യം ബാറ്റ് ചെയ്ത ബംഗ്ലാദേശ് ഒമ്പത് വിക്കറ്റ് നഷ്ടത്തിൽ 236 റൺസാണ് നേടിയത്. വിജയലക്ഷ്യം  ന്യൂസിലാൻഡ് അഞ്ചു വിക്കറ്റ് നഷ്ടത്തിൽ ലക്ഷ്യം മറികടക്കുകയായിരുന്നു. 

രചിൻ രവീന്ദ്രയുടെ സെഞ്ച്വറി കരുത്തിലാണ് ന്യൂസിലാൻഡ് വിജയിച്ചത്. 105 പന്തിൽ 112 റൺസാണ് രചിൻ നേടിയത്. 12 ഫോറുകളും ഒരു സിക്സുമാണ് താരം നേടിയത്. ഈ സെഞ്ച്വറിക്ക് പിന്നാലെ ഐതിഹാസികമായ ഒരു നേട്ടവും രചിൻ സ്വന്തമാക്കി. ഐസിസി ടൂർണമെൻ്റുകളിൽ 25ാം വയസ്സിൽ ഏറ്റവും കൂടുതൽ സെഞ്ച്വറി നേടുന്ന താരമായാണ് രചിൻ മാറിയത്. നാല് സെഞ്ച്വറികളാണ് ഇതിനോടകം തന്നെ രചിൻ ഐസിസി ടൂർണമെൻ്റിൽ നേടിയിട്ടുള്ളത്. മൂന്ന് സെഞ്ചുറികൾ 25ാം വയസ്സിൽ ഐസിസി ടൂർണമെന്റുകളിൽ ഇന്ത്യയ്ക്ക് വേണ്ടി നേടിയ സച്ചിൻ ടെൻഡുൽക്കറിനെ മറികടന്നാണ് രചിൻ ഈ നേട്ടം സ്വന്തമാക്കിയത്. രണ്ട് സെഞ്ച്വറികൾ നേടിയ മുൻ ശ്രീലങ്കൻ താരം ഉപൂൽ തരംഗയാണ് ഈ നേട്ടത്തിൽ മൂന്നാം സ്ഥാനത്ത് ഉള്ളത്

രചിന് പുറമെ ടോം ലാഥം അർദ്ധ സെഞ്ച്വറിയും നേടി വിജയത്തിൽ നിർണായകമായി. 77 പന്തിൽ 55 റൺസാണ് താരം നേടിയത്. മൂന്ന് ഫോറുകളാണ് താരം നേടിയത്. കിവീസ് ബൗളിങ്ങിൽ മൈക്കൽ ബ്രെയ്‌സ്‌വെൽ നാല് വിക്കറ്റുകൾ നേടി മിന്നും പ്രകടനമാണ് നടത്തിയത്. വില്ലി ഒ റൂർക്ക് രണ്ട് വിക്കറ്റുകളും മാറ്റ് ഹെൻറി, കെയ്ൽ ജാമിയേഴ്സൺ ഓരോ വിക്കറ്റും നേടി. 

ബംഗ്ലാദേശിനായി ക്യാപ്റ്റൻ നജ്മുൽ ഹുസ്സൈൻ ഷാന്റോ അർദ്ധ സെഞ്ച്വറി തകർപ്പൻ പ്രകടനമാണ് നടത്തിയത്.  ഒമ്പത് ഫോറുകൾ ഉൾപ്പടെ 110 പന്തിൽ 77 റൺസാണ് ഷാന്റോ നേടിയത്. ജാക്കർ അലി 55 പന്തിൽ 45 റൺസും നേടി. മൂന്ന് ഫോറുകളും ഒരു സിക്സുമാണ് താരം നേടിയത്. റിഷാദ് ഹുസ്സൈൻ 25 പന്തിൽ 26 റൺസും ടാൻസിദ് അഹമ്മദ് 22 പന്തിൽ 24 റൺസും നേടി. 

മാർച്ച് രണ്ടിന് ഇന്ത്യക്കെതിരെയാണ് ന്യൂസിലാൻഡിന്റെ അടുത്ത മത്സരം. ദുബായ് ഇന്റർനാഷണൽ സ്റ്റേഡിയത്തിൽ നടക്കുന്ന ഈ മത്സരത്തിലെ വിജയികൾ ആയിരിക്കും ഗ്രൂപ്പിലെ ചാമ്പ്യന്മാരാവുക.