തൊടുപുഴ: സംസ്ഥാനത്ത് തുടര്‍ച്ചയായി രണ്ടാം ദിവസവും 10 കോടി യൂനിറ്റിന് മുകളില്‍ വൈദ്യുതി ഉപഭോഗം. ഇന്നലെ രാവിലെ ഏഴിന് അവസാനിച്ച 24 മണിക്കൂറില്‍ ഉപഭോഗം 10.13 കോടി യൂനിറ്റിലെത്തി. 12.27 ലക്ഷം യൂനിറ്റിന്റെ വര്‍ധന. 10.01 കോടി യൂനിറ്റായിരുന്നു ചൊവ്വാഴ്ച രാവിലെ അവസാനിച്ച 24 മണിക്കൂറിലെ ഉപഭോഗം. പീക്ക് ലോഡ് ഡിമാന്റില്‍ നേരിയ കുറവുണ്ടായിട്ടുണ്ട്. 5004 മെഗാവാട്ടായിരുന്നു ചൊവ്വാഴ്ച വൈകിട്ടത്തെ പീക്ക് ലോഡ് ഡിമാന്റ്. കഴിഞ്ഞ ദിവസം ഇത് 5031 മെഗാവാട്ട് വരെ ഉയര്‍ന്നിരുന്നു.

എ.സി യുടേയും ഫാനിന്റേയും കൂടുതലായുള്ള ഉപയോഗമാണ് വൈദ്യുതി ഉപഭോഗം കുത്തനെ ഉയര്‍ത്തുന്നത്. പ്രതീക്ഷിച്ചതിനും അപ്പുറത്തുള്ള വൈദ്യുതി ആവശ്യകതയാണ് സംസ്ഥാനത്ത് ഇപ്പോള്‍ ഉള്ളത്. മാര്‍ച്ച് മാസത്തില്‍ 4800 മെഗാവാട്ട് വരെയാണ് വൈദ്യുതി ബോര്‍ഡ് ലോഡ് ഡെസ്പാച്ച് സെന്റര്‍ പ്രതീക്ഷിച്ച പരമാവധി പീക്ക് ലോഡ് ഡിമാന്റ്.