അരീക്കോട്: കഴിഞ്ഞ ദിവസമുണ്ടായ കനത്ത മഴയിലും ഇടിമിന്നലിലും വീട്ടുമുറ്റത്തെ കിണര്‍ ഇടിഞ്ഞുതാഴ്ന്നു. അരീക്കോട് പൂങ്കുടി തച്ചക്കോടന്‍ അബൂബക്കറിന്റെ വീട്ടുമുറ്റത്തെ കിണറാണ് ഏകദേശം ആറ് മീറ്ററോളം ആഴത്തില്‍ താഴ്ന്നത്. അബൂബക്കറിന്റെ വീടിന് പുറമെ പരിസരത്തെ രണ്ട് വീടുകളിലേക്ക് കൂടെ വെള്ളം പമ്പ് ചെയ്യുന്ന കിണറാണിത്. ഇവരുടേതടക്കം മൂന്ന് മോട്ടോറുകളും മണ്ണിനടിയില്‍പെട്ടു. വീടിനോട് ചേര്‍ന്നാണ് കിണര്‍ സ്ഥിതി ചെയ്യുന്നത് എന്നതിനാല്‍ വീടും തകര്‍ച്ചാഭീഷണിയിലാണ്. മോട്ടോറുകളുടെ ചെലവ് ഉള്‍പ്പടെ ഒരു ലക്ഷത്തോളം രൂപയുടെ നഷ്ടം കണക്കാക്കുന്നുണ്ട്. അരീക്കോട് വില്ലേജ് ഓഫിസ് അധികൃതര്‍ സ്ഥലം സന്ദര്‍ശിച്ചു.