റെഫ്രിജറേറ്ററുകള്‍, ശീതീകരിച്ച വാഹനങ്ങള്‍, സ്‌പ്രേയറുകള്‍, എയര്‍കണ്ടീഷണറുകള്‍ തുടങ്ങിയവ ഓസോണിനെ തകര്‍ക്കുന്നവയാണ്. ഇവയില്‍ നിന്ന് ഓസോണ്‍ വിനാശകാരികള്‍ പ്രവഹിക്കുന്നുണ്ട്. ഇതിനെതിരെ ബോധവല്‍ക്കരണം അത്യാവശ്യമാണ്. ഓസോണ്‍ പരിരക്ഷ ഏതൊരാളിന്റെയും കടമയും ചുമതലയുമാണ് എന്ന ബോധമാണ് വേണ്ടത്.
-ഓസോണ്‍ പരിരക്ഷ- സൗഹൃദറാലി. ഉപന്യാസരചന, ക്വിസ്, പ്രശ്‌നോത്തരി പരിസ്ഥിതി ബ്ലോഗ് ഉണ്ടാക്കല്‍ ഇവയെല്ലാം ദിനാചരണങ്ങളില്‍ ഒതുങ്ങിപ്പോകരുത്. എപ്പോഴും മനസിലുണ്ടാകേണ്ടതും പ്രവര്‍ത്തിയില്‍ ഒപ്പം കൊണ്ടുനടക്കുന്നതുമാകണം ഇവയെല്ലാം.
പോസ്റ്ററുകള്‍ അത്യാവശ്യമായി വേണ്ട ഒരു ദിനമാണിത്. ഓസോണ്‍ തുളയിലൂടെ മാരകമായ രശ്മികള്‍ വന്ന് ഭൂമിയ്ക്കും ജന്തുജാലങ്ങള്‍ക്കും ആപത്തുകള്‍ വരുത്തിവെക്കുന്നത് ചിത്രീകരിക്കാന്‍ കൂട്ടുകാര്‍ ഒരുങ്ങണം. പട്ടണങ്ങളിലും പൊതുജനശ്രദ്ധ പതിയുന്നിടത്തും ഇവ പതിപ്പിക്കണം.
പരിസ്ഥിതിയെ തകര്‍ക്കുന്ന കാരണങ്ങള്‍ കാണിക്കുന്ന ഡോക്യൂമെന്ററികള്‍ പ്രദര്‍ശിപ്പിക്കണം. വിവിധ ചാനലുകളില്‍ നിന്ന് ഇവ റെക്കോര്‍ഡ് ചെയ്‌തെടുക്കാം.
വിദ്യാലയം കേന്ദ്രമാക്കി ഒരു'ഓസോണ്‍ പരിരക്ഷാക്കൂട്ടം' ഉണ്ടാക്കാം. ചുറുചുറുക്കുള്ള കൂട്ടുകാര്‍ ഈ കൂട്ടായ്മയെ ഊര്‍ജസ്വലമാക്കട്ടെ. അതിന്റെ നേതൃത്വത്തിലാകട്ടെ പ്രവര്‍ത്തനങ്ങള്‍. വൈകിയിട്ടില്ല. ഓസോണിനെയും ജന്തുജാലങ്ങളെയും പരിരക്ഷിക്കാന്‍ തന്നാലായത് ചെയ്യും എന്ന പ്രതിജ്ഞയെടുത്ത് പ്രവര്‍ത്തനങ്ങള്‍ക്ക് ഇന്നു മുതല്‍ നമുക്ക് തുടക്കം കുറിയ്ക്കാം.