തിരുവനന്തപുരം: രക്താര്‍ബുദ ചികിത്സക്കിടെ ആര്‍.സി.സിയില്‍ നിന്ന് രക്തം സ്വീകരിച്ച ഒന്‍പതുവയസുകാരിക്ക് എച്ച്.ഐ.വി ബാധിച്ചതായി പരാതി. രക്ഷിതാക്കളുടെ പരാതിയുടെ അടിസ്ഥാനത്തില്‍ മെഡിക്കല്‍ കോളജ് പൊലിസ് കേസെടുത്ത് അന്വേഷണം ആരംഭിച്ചു. ഇക്കഴിഞ്ഞ മാര്‍ച്ചിലാണ് കുട്ടി ആര്‍.സി.സിയില്‍ ചികിത്സ തേടിയെത്തിയത്. പരിശോധനയില്‍ രക്താര്‍ബുദം സ്ഥിരീകരിച്ചതിനെ തുടര്‍ന്ന് നാലുതവണ റേഡിയേഷന്‍ തെറാപ്പി നടത്തി. ഇതിനുശേഷം കൗണ്ട് കുറഞ്ഞതിനെ തുടര്‍ന്ന് ബഌഡ് ട്രാന്‍സ്ഫ്യൂഷന്‍ നടത്തി. പിന്നീട് നടത്തിയ പരിശോധനയിലാണ് എച്ച്.ഐ.വി ബാധ സ്ഥിരീകരിച്ചത്. ആര്‍.സി.സിയില്‍ ചികിത്സയ്‌ക്കെത്തുന്നതിനു മുന്‍പുള്ള പരിശോധനകളില്‍ കുട്ടിക്ക് എച്ച്.ഐ.വി നെഗറ്റീവായിരുന്നു. അതിനുശേഷം മറ്റ് ആശുപത്രികളിലൊന്നും ചികിത്സ തേടിയതുമില്ല.
മെഡിക്കല്‍ കോളജ് എസ്.ഐ ഗിരീഷിന്റെ നേതൃത്വത്തിലാണ് അന്വേഷണം. ചികിത്സയുടെ തുടക്കം മുതലുള്ള എല്ലാ ഘട്ടങ്ങളും രക്തപരിശോധനകളും ബഌഡ് ബാങ്കിലെ രേഖകളും പരിശോധിച്ചശേഷം മെഡിക്കല്‍ ബോര്‍ഡ്, ഫൊറന്‍സിക് പാതോളജി വിഭാഗങ്ങള്‍ എന്നിവരുടെ സഹായത്തോടെ പിഴവുകണ്ടെത്താനാണ് പൊലിസ് ആലോചന.
അതിനുശേഷം ഉത്തരാവാദിത്തപ്പെട്ടവര്‍ക്കെതിരേ നിയമ നടപടി സ്വീകരിക്കുമെന്നും പൊലിസ് അറിയിച്ചു. കഴക്കൂട്ടം സൈബര്‍സിറ്റി അസി. കമ്മിഷണര്‍ പ്രമോദ്കുമാറിന്റെ നേതൃത്വത്തില്‍ പൊലിസ് സംഘം ഇന്ന് ആര്‍.സി.സിയിലെത്തി വിവരങ്ങള്‍ ശേഖരിക്കും. അതേസമയം മാനദണ്ഡങ്ങള്‍ പാലിച്ചാണ് രക്തം നല്‍കിയതെന്നാണ് ആശുപത്രി അധികൃതരുടെ വിശദീകരണം. വീഴ്ച പറ്റിയിട്ടുണ്ടോയെന്ന് പരിശോധിക്കാന്‍ ബ്ലഡ് ബാങ്ക് ജീവനക്കാര്‍ക്ക് നിര്‍ദേശം നല്‍കിയിട്ടുണ്ട്.