തിരൂരങ്ങാടി: മദ്യലഹരിയില്‍ പൊലിസ് സ്റ്റേഷനില്‍നിന്നും ഇറങ്ങിയോടിയ യുവാവിനെ പൊലിസുകാര്‍ ഓടിച്ചു പിടിച്ചു. തെന്നല സ്വദേശിയായ ഓട്ടോഡ്രൈവറെയാണ് ഇന്നലെ വൈകിട്ട് ചെമ്മാട് ബസ് സ്റ്റാന്റിനു മുന്‍വശം മെയിന്‍ റോഡില്‍വെച്ച് തിരൂരങ്ങാടി പൊലിസ് പിടികൂടിയത്.
കക്കാട് മേലെ പമ്പിന് മുന്‍വശത്ത് വെച്ച് വേങ്ങര സ്വദേശിയുടെ നിര്‍ത്തിയിട്ട കാറിനു പിന്നില്‍ ഇയാള്‍ ഓടിച്ച ഓട്ടോറിക്ഷ ഇടിച്ചതിനെ തുടര്‍ന്ന് സ്റ്റേഷനില്‍ എത്തിച്ചതായിരുന്നു. കാറിന് കേടുപാടുകള്‍ പരിഹരിക്കാനുള്ള ചര്‍ച്ച പരാജയപെട്ടതിനെ തുടര്‍ന്ന് പൊലിസെത്തി സ്റ്റേഷനിലേക്ക് കൊണ്ടുവരികയായിരുന്നു.
പൊലിസിന്റെ പ്രാഥമിക പരിശോധനയില്‍ ഇയാള്‍ മദ്യപിച്ചതായി തെളിഞ്ഞു. വാഹന ഉടമ എത്തിയതോടെ ഇയാള്‍ സ്റ്റേഷനില്‍ നിന്നും ഇറങ്ങി ഓടുകയായിരുന്നു. വാഹനം ഇടിച്ചത് സംബന്ധിച്ച് ഒത്തുതീര്‍പ്പിലെത്തിയെങ്കിലും മദ്യപിച്ച് വാഹനം ഓടിച്ചതിന് കേസെടുക്കുമെന്ന് പൊലിസ് പറഞ്ഞു.