സിയൂള്‍: ഇന്ത്യയുടെ പി.വി സിന്ധു കൊറിയ ഓപണ്‍ സൂപ്പര്‍ സീരീസ് ബാഡ്മിന്റണ്‍ പോരാട്ടത്തിന്റെ ഫൈനലില്‍. സെമിയില്‍ ആറാം സീഡ് ചൈനയുടെ ഹി ബിങ്ജിയാവോയെ കീഴടക്കിയാണ് സിന്ധു ഫൈനലിലേക്ക് മുന്നേറിയത്. ദിവസങ്ങള്‍ക്ക് മുന്‍പ് അരങ്ങേറിയ ലോക ചാംപ്യന്‍ഷിപ്പിന്റെ ഫൈനലിന്റെ ആവര്‍ത്തനമായി കൊറിയ സൂപ്പര്‍ സീരീസ് പോരാട്ടവും മാറും. ഫൈനലില്‍ സിന്ധുവിന്റെ എതിരാളി ജപ്പാന്‍ താരം നോസോമി ഒകുഹാരയാണ്. സിന്ധുവിനെ കീഴടക്കിയാണ് ഒകുഹാര ലോക കിരീടം സ്വന്തമാക്കിയത്.
ബിങ്ജിയാവോയ്‌ക്കെതിരേ മൂന്ന് സെറ്റ് നീണ്ട സെമി പോരാട്ടത്തില്‍ കടുത്ത വെല്ലുവിളി അതിജീവിച്ച് ഉജ്ജ്വല പോരാട്ടം പുറത്തെടുത്താണ് സിന്ധു വിജയം സ്വന്തമാക്കിയത്. സ്‌കോര്‍: 21-10, 17-21, 21-16. ലോക ചാംപ്യന്‍ഷിപ്പിലെ തോല്‍വിക്ക് ഒകുഹാരയോട് പകരം ചോദിക്കാനുള്ള അവസരം കൂടിയാണ് ഇന്ത്യന്‍ താരത്തിന് കൊറിയന്‍ പോരാട്ടത്തിലെ ഫൈനല്‍. നാട്ടുകാരിയും ലോക രണ്ടാം നമ്പര്‍ താരവുമായി അകനെ യമഗുചിയെ പരാജയപ്പെടുത്തിയാണ് ഒകുഹാര ഫൈനലിലേക്ക് കടന്നത്.