കോഴിക്കോട്: മുഅല്ലിംകളുടെ പങ്കും സമസ്തയുടെ പോഷക ഘടകങ്ങളുടെയും പ്രവര്‍ത്തകരുടെയും അശ്രാന്ത പരിശ്രമവുമാണ് സുപ്രഭാതത്തിന്റെ വിജയത്തിനു പിന്നിലെന്ന് സമസ്ത ഉപാധ്യക്ഷന്‍ പാണക്കാട് സയ്യിദ് ഹൈദരലി ശിഹാബ് തങ്ങള്‍. സുപ്രഭാതത്തിന്റെ ശില്‍പിയായ ബാപ്പു മുസ്‌ലിയാരുടെ വിടവ് ഒരിക്കലും നികത്താനാവാത്തതാണ്. ഏറ്റെടുത്ത കാര്യങ്ങളെല്ലാം കൃത്യമായി നിര്‍വഹിക്കാന്‍ അദ്ദേഹത്തിന് കഴിഞ്ഞു. ഹജ്ജ് കമ്മിറ്റി, പട്ടിക്കാട് ജാമിഅ നൂരിയ്യ, എം.ഇ.എ എന്‍ജിനിയറിങ് കോളജ്, കടമേരി റഹ്മാനിയ, കോട്ടുമല കോംപ്ലക്‌സ് തുടങ്ങിയവയെ മുന്‍നിരയില്‍ നിന്ന് നയിക്കാന്‍ അദ്ദേഹത്തിന് സാധിച്ചു. ഹജ്ജ് കമ്മിറ്റിയിലും വിദ്യാഭ്യാസ ബോര്‍ഡിലും അദ്ദേഹത്തിന്റെ മികവ് വേറിട്ടു നില്‍ക്കുന്നതായിരുന്നുവെന്നും തങ്ങള്‍ അഭിപ്രായപ്പെട്ടു.