മണ്ണാര്‍ക്കാട്: നെല്ലിപ്പുഴ ദാറുന്നജാത്തിലെ പൂര്‍വ വിദ്യാര്‍ഥികള്‍ ഒത്തുകൂടി. നിത്യവൃത്തിക്കുപോലുംപ്രയാസപ്പെട്ടിരുന്ന കാലത്തെ കൈപ്പേറിയ അനുഭവങ്ങളോടൊപ്പം തങ്ങളെ ഇന്നത്തെ നിലയിലെത്തിക്കുന്നതിന് സഹായിച്ച ദാറുന്നജാത്ത് അനാഥാലയത്തിലെ ജീവിതാനുഭവങ്ങളും അവര്‍ പങ്ക് വെച്ചു ഓര്‍മകള്‍ പുതുക്കി. അനാഥാലയത്തിന്റെ കീഴില്‍ തുടങ്ങിയ നജാത്ത് എഡ്യുസിറ്റി സ്ഥാപനങ്ങളിലും ആ പഴയ വിദ്യാര്‍ഥികള്‍ കയറിയിറങ്ങി. 84 പ്രതിനിധികളാണ് സംഗമത്തില്‍ പങ്കെടുത്തത്. പൂര്‍വവിദ്യാര്‍ഥി സംഗമവും വാട്‌സ് അപ്പ് കൂട്ടായ്മയും സെക്രട്ടറി ടി.എ സലാം മാസ്റ്റര്‍ ഉദ്ഘാടനം ചെയ്തു. പ്രിന്‍സിപ്പല്‍ അബ്ദുല്ല ദാരിമി അധ്യക്ഷനായി. ദാറുന്നജാത്തിന്റെ പുരോഗതിക്ക് വേണ്ടി പ്രവര്‍ത്തിക്കുന്നതിന് വേണ്ടി ഓള്‍ഡ് സ്റ്റുഡന്റ്‌സ് ഫെഡറേഷന്‍ ഓഫ് നജാത്ത് (ഒ.എസ്.എഫ്.ഒ.എന്‍) എന്ന പേരില്‍ കൂട്ടായ്മക്കും രൂപം നല്‍കി. കമ്മിറ്റി പ്രസിഡന്റ് സയ്യിദ് ഷഫീഉല്ല ജമലുല്ലൈലി തങ്ങള്‍, സെക്രട്ടറിയായി ത്വരീഖ് പുല്ലശ്ശേരി, ട്രഷററായി ലുഖ്മാനുല്‍ ഹഖീം എന്നിവരെയും തിരഞ്ഞെടുത്തു.