കൊല്ലം: കൊട്ടിയംത്ത് കഴിഞ്ഞദിവസം പെയ്ത ശക്തമായ മഴയില്‍ വീടിന്റെ പിന്‍ഭാഗം തകര്‍ന്നു വീണു. കൊട്ടിയം പോളിടെക്‌നിക് ജംഗ്ഷനു സമീപം വിജയ ഭവനില്‍ സാബുവിന്റെ വീടിന്റെ അടുക്കള ഉള്‍പ്പെട്ട ഭാഗമാണ് ഞായറാഴ്ച രാത്രി ചെയ്ത ശക്തമായ മഴയില്‍ നിലം പതിച്ചത്. അടുക്കളയിലെ ജോലികഴിഞ്ഞ് വീട്ടുകാര്‍ മുന്‍വശത്തായിരുന്നതിനാല്‍ അപകടം ഒഴിവായി. ഓട് മേഞ്ഞ വീടിന്റെ മേല്‍ക്കൂര തകര്‍ന്ന നിലയിലായതിനാല്‍ മഴവെള്ളം വീണ് കിടപ്പുമുറിയുള്‍പ്പെടെയുള്ള മറ്റ് ഭാഗങ്ങളും ഏത് നിമിഷവും നിലംപതിക്കാവുന്ന അവസ്ഥയിലാണ്. വൃദ്ധയായ മാതാവിനേയും ഭാര്യയേയും മക്കളേയും എങ്ങോട്ട് മാറ്റി പാര്‍പ്പിക്കണമെന്നറിയാതെ വിഷമിക്കുകയാണ് കൂലിപ്പണിക്കാരനായ സാബു. നേരത്തെ വീടിന്റെ അറ്റകുറ്റപ്പണികള്‍ ചെയ്യുന്നതിനു പഞ്ചായത്തില്‍ അപേക്ഷിച്ചെങ്കിലും പരിഗണിച്ചില്ലന്ന് പരാതിയുണ്ട്. വാര്‍ഡംഗം രേഖചന്ദ്രന്‍, ബ്ലോക്ക് പഞ്ചായത്തംഗം മൈലക്കാട് സുനില്‍ എന്നിവര്‍ സ്ഥലം സന്ദര്‍ശിച്ചു വിവരങ്ങള്‍ വില്ലേജധികൃതര്‍ക്ക് കൈമാറി.