ദോഹ: സമൂഹത്തില്‍ വര്‍ധിച്ചുവരുന്ന ആത്മീയ ചൂഷണത്തെ കരുതിയിരിക്കണമെന്നും ഇല്ലാത്ത അത്ഭുതകഥകള്‍ പ്രചരിപ്പിച്ചു ആത്മീയതയോടുള്ള ജനങ്ങളുടെ ആഭിമുഖ്യത്തെ ദുരുപയോഗം ചെയ്യുന്ന കപട ആത്മീയതയുടെ വക്താക്കളെയും വ്യാജ ത്വരീഖത്തുകാരെയും അകറ്റിനിറുത്തണമെന്നും സമസ്ത കേരള ജംഇയ്യത്തുല്‍ ഉലമ സംസ്ഥാന പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍. ദോഹയില്‍ ഒരുക്കിയ സ്വീകരണ സമ്മേളനത്തില്‍ സംസാരിക്കുകയായിരുന്നു അദ്ദേഹം.
മതവിരുദ്ധവും ന്യൂനപക്ഷവിരുദ്ധവുമായ നയങ്ങളെയും നടപടികളെയും മഹത്തായ ഇന്ത്യന്‍ ഭരണഘടനക്കുള്ളില്‍നിന്ന് എതിര്‍ക്കുകയെന്നതാണ് സമസ്തയുടെ നയമെന്നും സമൂഹത്തില്‍ ചിദ്രത സൃഷ്ടിക്കുന്ന ശക്തികള്‍ക്കെതിരേ കര്‍ശനമായി നിലകൊള്ളുമെന്നും തങ്ങള്‍ സൂചിപ്പിച്ചു. മലപ്പുറം ജില്ലയിലെ മുണ്ടക്കുളത്ത് നടന്നുവരുന്ന ശംസുല്‍ ഉലമ മെമ്മോറിയല്‍ ഇസ്‌ലാമിക് കോംപ്ലക്‌സ് (എസ്.എം.ഐ.സി) ഖത്തര്‍ കമ്മിറ്റിയുടെ പ്രഖ്യാപനം തങ്ങള്‍ നിര്‍വഹിച്ചു. എസ്.എം.ഐ.സി ജനറല്‍ സെക്രട്ടറി അബ്ദുല്‍ ഗഫൂര്‍ ദാരിമി പദ്ധതി വിശദീകരിച്ചു. സ്വീകരണ സമ്മേളനം കേരള ഇസ്‌ലാമിക് സെന്റര്‍ ജനറല്‍ സെക്രട്ടറി ഇസ്മാഊല്‍ ഹുദവി ഉദ്ഘാടനം ചെയ്തു. സീനിയര്‍ വൈസ് പ്രസിഡന്റ് മുഹമ്മദലി ഖാസിമി അധ്യക്ഷനായി. എസ്.കെ.എസ്.എസ്.എഫ് ഖത്തര്‍ കമ്മിറ്റി പ്രസിഡന്റ് മുനീര്‍ ഹുദവി ചങ്ങരംകുളം, സലീം നാലകത്ത്, ഫൈസല്‍ നിയാസ് ഹുദവി, ബാപ്പു ഹാജി സംസാരിച്ചു.