കണ്ണൂര്‍: സംഘടനാ പ്രവര്‍ത്തകര്‍ക്ക് മാര്‍ഗനിര്‍ദേശവുമായി കോണ്‍ഗ്രസ് ജില്ലാ നേതൃത്വം. മണ്ഡലം പ്രസിഡന്റുമാര്‍ക്കാണ് പുതിയ കാലത്തെ പ്രവര്‍ത്തനം സംബന്ധിച്ചുള്ള പരിശീലനം എന്ന ഉദ്ദേശത്തോടെ മാര്‍ഗനിര്‍ദേശം നല്‍കിയത്. ആരാധനാലയങ്ങള്‍ക്കും വിദ്യാലയങ്ങള്‍ക്കും സമീപം ബാറുകള്‍ പ്രവര്‍ത്തിക്കാന്‍ അനുമതി നല്‍കിയതിനെതിരേയും ലൈഫ് ഭവനപദ്ധതി അട്ടിമറിച്ചതിനെതിരേയും ഒക്ടോബര്‍ 5ന് യു.ഡി.എഫ് സമരം സംഘടിപ്പിക്കും. മണ്ഡലം ഭാരവാഹികളുടെ നേതൃത്വത്തില്‍ സ്‌ക്വാഡ് പ്രവര്‍ത്തനത്തിന് മണ്ഡലം പ്രസിഡന്റുമാരെ ചുമതലപ്പെടുത്തി. കോണ്‍ഗ്രസ് സംഘടനാ തെരഞ്ഞെടുപ്പുമായി ബന്ധപ്പെട്ട് സമവായത്തിന്റെ അടിസ്ഥാനത്തില്‍ ജില്ലയിലെ 1776 ബൂത്ത് പ്രസിഡന്റുമാരുടെയും പേര് വിവരം തെരഞ്ഞെടുപ്പ് അതോറിറ്റിക്ക് നല്‍കുന്നതിന് രണ്ട് നേതാക്കളെ ചുമതലപ്പെടുത്തി. യോഗം ഡി.സി.സി പ്രസിഡന്റ് സതീശന്‍ പാച്ചേനി ഉദ്ഘാടനം ചെയ്തു.