നെടുമ്പാശ്ശേരി: യുവാക്കളെ ആക്രമിച്ച് പേഴ്‌സും സ്വര്‍ണാഭരണങ്ങളും കൈക്കലാക്കാന്‍ ശ്രമിച്ച സംഘം ഒരാളുടെ വെള്ളി ബ്രേസ്‌ലെറ്റ് തട്ടിയെടുത്തു കടന്നുകളഞ്ഞു. ബന്ധുവിനെ യാത്രയാക്കിയ ശേഷം നെടുമ്പാശ്ശേരി അന്താരാഷ്ട്ര വിമാനത്താവളത്തില്‍ നിന്നും മടങ്ങിയ യുവാക്കളാണ് ആക്രമണത്തിനിരയായത്. തലശേരി ന്യുമാഹി സ്വദേശി അജീഷ് (30), സുഹൃത്തുക്കളായ പ്രതീഷ്, ധര്‍മ്മരാജ് എന്നിവരെ ആക്രമിച്ച സംഘം അജീഷിന്റെ ബ്രേസ്‌ലെറ്റാണ് തട്ടിയെടുത്തത്. ഇന്നലെ പുലര്‍ച്ചെ ഒന്നരയോടെ അത്താണി വിമാനത്താവള റോഡിലാണ് സംഭവം.
വീട്ടിലേക്ക് പോകുന്നതിനിടെ ചായ കുടിക്കാന്‍ സിഗ്‌നല്‍ ജങ്ഷനില്‍ നിര്‍ത്തിയപ്പോഴാണ് മൂന്നംഗ സംഘമെത്തി ആക്രമിച്ചത്. ഇതിനിടെ ഹോട്ടലിലെ ജീവനക്കാര്‍ ഓടിയെത്തിയതോടെ പ്രതികള്‍ മുങ്ങുകയായിരുന്നു. തുടര്‍ന്ന് ആക്രമണത്തിനിരയായ മൂവരും ദേശം സി.എ ആശുപത്രിയില്‍ ചികിത്സ തേടി. സി.സി ടി.വി ദൃശ്യങ്ങളുടെ അടിസ്ഥാനത്തില്‍ നടത്തിയ അന്വേഷണത്തില്‍ പ്രതികളെ സംബന്ധിച്ച് സൂചന ലഭിച്ചതായി നെടുമ്പാശേരി സി.ഐ പി.എം ബൈജു അറിയിച്ചു.