പഴയങ്ങാടി: പതിനഞ്ച് കിലോയിലധികം കഞ്ചാവുമായി തെലങ്കാന സ്വദേശിനിയെ കണ്ണപുരം പൊലിസ് പിടികൂടി. തെലങ്കാനയില്‍ നിന്ന് കഞ്ചാവുമായി കണ്ണപുരം റെയില്‍വേ സ്റ്റേഷനിലിറങ്ങിയ ശൈലജ (32)യെയാണ് ഇന്നലെ പുലര്‍ച്ചെ രണ്ടരയോടെ എസ്.ഐ ടി.വി ധനഞ്ജയദാസും സംഘവും പിടികൂടിയത്. പിടിച്ചെടുത്ത കഞ്ചാവിന് അന്താരാഷ്ട്ര മാര്‍ക്കറ്റില്‍ കോടികള്‍ വിലമതിക്കും. പുലര്‍ച്ചെ റെയില്‍വേ സ്റ്റേഷനു സമീപത്തെ ഓട്ടോസ്റ്റാന്‍ഡില്‍ സംശയകരമായി കണ്ട യുവതിയെ പൊലിസ് ചോദ്യം ചെയ്തപ്പോഴാണ് സംഭവം പുറത്തായത്. തുടര്‍ന്ന് നടത്തിയ പരിശോധനയിലാണ് സ്റ്റേഷനില്‍ ഒളിപ്പിച്ച നിലയില്‍ കഞ്ചാവ് കണ്ടെത്തിയത്. പ്രദേശങ്ങളില്‍ മൊത്തക്കച്ചവടത്തിനായി എത്തിച്ചതാണെന്ന് യുവതി പറഞ്ഞു.