ന്യൂഡല്‍ഹി: സംഘ്പരിവാര്‍ ആസൂത്രണംചെയ്തു നടപ്പാക്കിയ മലേഗാവ് സ്‌ഫോടനക്കേസിലെ രണ്ടുപ്രതികള്‍ക്ക് ജാമ്യം. സുധാകര്‍ ചതുര്‍വേദി, സുധാകര്‍ ദ്വിവേദി എന്ന സ്വാമി ദയാനന്ദ് പാണ്ഡെ എന്നിവര്‍ക്കാണ് മുംബൈയിലെ പ്രത്യേക വിചാരണക്കോടതി ജാമ്യം നല്‍കിയത്. സ്‌ഫോടനം നടത്താനുള്ള ഗൂഢാലോചനയില്‍ പങ്കാളികളായി എന്നതാണ് ഇരുവര്‍ക്കുമെതിരായി എന്‍.ഐ.എ കണ്ടെത്തിയിരുന്നത്. അഞ്ചുലക്ഷംരൂപയുടെ വ്യക്തിഗത ബോണ്ടിന്‍മേലാണ് മുംബൈ എന്‍.ഐ.എ കോടതി ജാമ്യം നല്‍കിയത്. കേസിലെ പ്രധാനപ്രതികളായ സനാതന്‍ സന്‍സ്ത സ്ഥാപക സാധ്വി പ്രഗ്യാസിങ്ങിനും ആര്‍.എസ്.എസ് പ്രവര്‍ത്തകന്‍ ലഫ്റ്റനന്റ് പ്രസാദ് ശ്രീകാന്ത് പുരോഹിതിനും നേരത്തെ ജാമ്യം ലഭിച്ചിരുന്നു.
2008 സെപ്റ്റംബര്‍ 29 നുണ്ടായ സ്‌ഫോടനത്തില്‍ ആറുപേര്‍ മരിക്കുകയും നൂറിലേറെ പേര്‍ക്കു പരുക്കേല്‍ക്കുകയും ചെയ്തിരുന്നു. കേസുമായി ബന്ധപ്പെട്ട് സംഘ്പരിവാര്‍ സംഘടനയില്‍പ്പെട്ട 12 പേരെയാണ് പിടികൂടിയിരുന്നത്. ഈ കേസിലെ മിക്ക പ്രതികളും മക്കാമസ്ജിദ്, മൊദാസ, അജ്മീര്‍, സംഝോത സ്‌ഫോടനങ്ങളുമായി ബന്ധമുള്ളവരാണ്.