മാനന്തവാടി: കഴിഞ്ഞ മൂന്ന് ദിവസങ്ങളില്‍ ജില്ലയില്‍ ലഭിച്ച ശക്തമായ മഴ കാരണം നേരത്തെ ജില്ലയിലുണ്ടായിരുന്ന മഴക്കുറവ് 47 ശതമാനത്തില്‍ നിന്ന് 37ശതമാനി കുറഞ്ഞു.
കഴിഞ്ഞ കാലവര്‍ഷത്തില്‍ 59 ശതമാനത്തിന്റെ മഴക്കുറവായിരുന്നു ജില്ലയില്‍ അനുഭവപ്പെട്ടത്.
തിരുവനന്തപുരം കാലാവസ്ഥാ നിരീക്ഷണ കേന്ദ്രത്തിന്റെ കണക്കുകള്‍ പ്രകാരം ബുധനാഴ്ച അവസാനിച്ച ജില്ലയിലെ മണ്‍സൂണില്‍ 37 ശതമാനത്തിന്റെ കുറവാണ് രേഖപ്പെടുത്തിയത്. മുന്‍വര്‍ഷം ഇത് 59 ശതമാനവും ഈ മാസം 13ന് അവസാനിച്ച ആഴ്ച വരെ 47 ശതമാനവുമായിരുന്നു. ജൂണ്‍ ഒന്നിന് ആരംഭിക്കുന്ന മണ്‍സൂണ്‍ കാലവര്‍ഷത്തില്‍ ബുധനാഴ്ച വരെ ജില്ലക്ക് ലഭിക്കേണ്ടിയിരുന്നത് 2551.9 മില്ലീമീറ്റര്‍ മഴയായിരുന്നു. ഇതില്‍ 1601.3 മില്ലീ മീറ്റര്‍ മഴ ലഭിച്ചു.
47 ശതമാനം മഴക്കുറവുണ്ടായിരുന്ന ജില്ലയില്‍ കഴിഞ്ഞ മൂന്ന് ദിവസങ്ങളിലായി ലഭിച്ച ഉയര്‍ന്ന മഴയാണ് തോത് കുറയാനിടയാക്കിയത്. കഴിഞ്ഞ ഞായര്‍, തിങ്കള്‍, ചൊവ്വ ദിവസങ്ങളിലായി ജില്ലയില്‍ 287 മില്ലീ മീറ്റര്‍ മഴയാണ് ലഭിച്ചത്.
ജില്ലയില്‍ ഈ ദിവസങ്ങളില്‍ ഏറ്റവും ഉയര്‍ന്ന മഴ ലഭിച്ചത് വൈത്തിരിയിലാണ്.
വൈത്തിരിയില്‍ 282.9 മില്ലീമീറ്റര്‍ മഴ ലഭിച്ചപ്പോള്‍ മാനന്തവാടിയില്‍ 187.2 മില്ലീമീറ്ററും ബത്തേരിയില്‍ 99.2 മില്ലിമീറ്ററും അമ്പലവയലില്‍ 78.2 മില്ലിമീറ്ററും മഴ ലഭിച്ചു. മണ്‍സൂണ്‍ കാലവര്‍ഷം സെപ്റ്റംബര്‍ മുപ്പതോടെ അവസാനിക്കുമ്പോള്‍ ഇനിയുള്ള ദിവസങ്ങളില്‍ ശക്തമായ മഴ ലഭിച്ചാല്‍ പോലും ജില്ലയില്‍ കഴിഞ്ഞ കുറെ വര്‍ഷങ്ങളായി തുടരുന്ന മഴക്കുറവ് പരിഹരിക്കപ്പെടുകയില്ലെന്നാണ് സൂചിപ്പിക്കുന്നത്.