ആലക്കോട്: കേരള കോണ്‍ഗ്രസ് യു.ഡി.എഫ് വിട്ടത് അത്യന്തം ഖേദകരമാണെന്നും അവരെ തിരിച്ചുകൊണ്ടുവരാനുള്ള ശ്രമങ്ങള്‍ തുടരുമെന്നും മുന്‍ മുഖ്യമന്ത്രി ഉമ്മന്‍ ചാണ്ടി. ഇരിട്ടി, പേരാവൂര്‍ ബ്ലോക്ക് കോണ്‍ഗ്രസ് കമ്മിറ്റികളുടെ നേതൃത്വത്തില്‍ പൈതല്‍മലയില്‍ ദ്വിദിന നേതൃത്വ ക്യാംപ് ഉദ്ഘാടനം ചെയ്യുകയായിരുന്നു അദ്ദേഹം. കേരളത്തിലും ദേശീയതലത്തിലും കോണ്‍ഗ്രസിനുണ്ടായ പരാജയം താല്‍ക്കാലികമാണ്. പാര്‍ട്ടി ശക്തിപ്പെടാന്‍ ശക്തിപ്രകടനങ്ങള്‍ക്കു പകരം നേതൃത്വ ക്യാംപുകളാണ് ആവശ്യമെന്നും അദ്ദേഹം പറഞ്ഞു. തോമസ് വര്‍ഗീസ് അധ്യക്ഷനായി. മുന്‍മന്ത്രി കെ.സി ജോസഫ്, അഡ്വ.സണ്ണി ജോസഫ് എം.എല്‍.എ, അഡ്വ.സജീവ് ജോസഫ്, അഡ്വ.സോണി സെബാസ്റ്റ്യന്‍, ചാക്കോ പാലക്കലോടി, ജോഷി കണ്ടത്തില്‍, ഡെയ്‌സി മാണി, ലിസി ജോസഫ്, ബൈജു വര്‍ഗീസ്, മാത്യു കുഴല്‍നാടന്‍, സി.സി രാമകൃഷ്ണന്‍ എന്നിവര്‍ ക്ലാസെടുത്തു. ക്യാംപ് ഇന്ന് സമാപിക്കും.