ന്യൂഡല്‍ഹി: ഇസ്രത്ത് ജഹാനെ പിന്തുണക്കുന്ന ആളാണ് രാഹുല്‍ ഗാന്ധിയെന്ന് ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ്. എന്നാല്‍ ദേശീയ നേതാക്കള്‍ക്കെതിരേ സൂക്ഷിച്ച് സംസാരിക്കണമെന്ന് കോണ്‍ഗ്രസിന്റെ മുന്നറിയിപ്പ്. ഇതോടെ കോണ്‍ഗ്രസും ബി.ജെ.പിയും തമ്മിലുള്ള വാഗ്വാദം രൂക്ഷമായി.
ഗുജറാത്ത് നിയമസഭാ തെരഞ്ഞെടുപ്പിന് മുന്നോടിയായി അഹമ്മദാബാദില്‍ നടത്തിയ പൊതു സമ്മേളനത്തിലാണ് യു.പി മുഖ്യമന്ത്രിയുടെ വിവാദ പരാമര്‍ശമുണ്ടായത്. ഇതിനെതിരേയാണ് സൂക്ഷിച്ച് സംസാരിക്കണമെന്നും മണിപ്പൂര്‍, പഞ്ചാബ്, ഗോവ സംസ്ഥാനങ്ങളിലെ തെരഞ്ഞെടുപ്പില്‍ കോണ്‍ഗ്രസാണ് മുന്നിലെത്തിയതെന്ന കാര്യം ബി.ജെ.പി മറക്കരുതെന്നും കോണ്‍ഗ്രസ് നേതാവ് പ്രമോദ് തിവാരി യോഗിയെ ഓര്‍മിപ്പിച്ചു.
കഴിഞ്ഞ 14 വര്‍ഷമായി അമേത്തിയിലെ എം.പിയായ അദ്ദേഹത്തിന് അവിടെ ഒരു കലക്ടറേറ്റ് കെട്ടിടം നിര്‍മിക്കാന്‍ പോലും കഴിഞ്ഞില്ലെന്നുമായിരുന്നു യോഗിയുടെ പരാമര്‍ശം.
ഗുജറാത്ത് തെരഞ്ഞെടുപ്പ് പ്രചരണം ഏറ്റെടുക്കാന്‍ നരേന്ദ്ര മോഡിക്ക് ഭയമുള്ളതുകൊണ്ടാണ് യോഗിയെക്കൊണ്ട് എരിതീയില്‍ എണ്ണയൊഴിപ്പിക്കുന്നതാണ് യോഗിയുടെ പരാമര്‍ശമെന്ന് പ്രമോദ് തിവാരി ആരോപിച്ചു.