അമരാവതി: പൂജാരിമാരെ വിവാഹം ചെയ്യുന്നവര്‍ക്ക് സര്‍ക്കാര്‍ വക ധനസഹായം. ബ്രാഹ്മണ പൂജാരിമാരെ വിവാഹം ചെയ്യുന്നവര്‍ക്ക് മൂന്നു ലക്ഷം രൂപയുടെ സഹായമാണ് തെലങ്കാന സര്‍ക്കാര്‍ പ്രഖ്യാപിച്ചിരിക്കുന്നത്.
ധനസഹായം അടുത്ത മാസം മുതല്‍ വിതരണം ചെയ്യുമെന്ന് സര്‍ക്കാര്‍ വക്താവ് പറഞ്ഞു. ക്ഷേത്രങ്ങളില്‍ ജോലി ചെയ്യുന്ന ബ്രാഹ്മണ യുവാക്കള്‍ക്കു ഭാര്യമാരെ ലഭിക്കാന്‍ പ്രയാസമുള്ളതിനാലാണ് ഇത്തരത്തിലുള്ള ധനസഹായ പദ്ധതിക്കു തുടക്കമിട്ടിരിക്കുന്നത്. ദമ്പതികള്‍ക്കുള്ള സംയുക്ത നിക്ഷേപമാണ് ഈ പണം. വിവാഹ ദിവസത്തില്‍ ഒരു ലക്ഷം രൂപ നല്‍കും.
ഭര്‍ത്താക്കന്മാരെ തെരഞ്ഞെടുക്കുന്നതില്‍ യുവതികള്‍ വളരെ സൂക്ഷ്മത പുലര്‍ത്തുന്നുണ്ടെന്നും ക്ഷേത്രങ്ങളില്‍ ജോലി ചെയ്യുന്ന ബ്രാഹ്മണ പൂജാരിമാര്‍ക്ക് ഭാര്യമാരെ ലഭിക്കാന്‍ ഇപ്പോള്‍ പ്രയാസമാണെന്നും തെലങ്കാന മുഖ്യമന്ത്രിയുടെ മുഖ്യ ഉപദേഷ്ടാവും തെലങ്കാന ബ്രാഹ്മണ്‍ സമീക്ഷ പരിഷത്ത് ചെയര്‍മാനുമായ കെ.വി രാമനാചാരി പറഞ്ഞു.
സംസ്ഥാനത്തെ 4,805 ക്ഷേത്രങ്ങളിലെ പൂജാരിമാര്‍ക്കു സര്‍ക്കാര്‍ ശമ്പള സ്‌കെയില്‍ അടിസ്ഥാനത്തിലുള്ള തുക നല്‍കാന്‍ നേരത്തെ തെലങ്കാന സര്‍ക്കാര്‍ തീരുമാനിച്ചിരുന്നു. അടുത്ത മാസം മുതലാണ് ഈ ശമ്പള വിതരണം ആരംഭിക്കുന്നത്.