മുംബൈ: കേന്ദ്രസര്‍ക്കാരിനെതിരേ രൂക്ഷ വിമര്‍ശനവുമായി വീണ്ടും ശിവസേന. സര്‍ക്കാര്‍ പറഞ്ഞ നല്ല നാളുകളുടെ (അച്ഛേദിന്‍) ദീപാവലി എവിടെയെന്ന് ശിവസേന ചോദിച്ചു. പാര്‍ട്ടി മുഖപത്രമായ സാമ്‌നയിലാണ് ഇതുസംബന്ധിച്ച മുഖപ്രസംഗം.
രാജ്യത്തു സാമ്പത്തിക പിന്നോക്കാവസ്ഥയാണെന്നു പറഞ്ഞ ശിവസേന, ദീപാവലി വന്നുപോകുമെന്നും എന്നാല്‍ ആ പിന്നോക്കാവസ്ഥ എന്നു മാറുമെന്നും ചോദ്യമുന്നയിച്ചു. ഇതു കേന്ദ്ര സര്‍ക്കാര്‍ വ്യക്തമാക്കണം. നോട്ടുനിരോധനത്തിന്റെ ദുരിതങ്ങള്‍ ആവര്‍ത്തിക്കാതിരിക്കാനും സമ്പാദിച്ച പണം നഷ്ടപ്പെടാതിരിക്കാനും ലക്ഷ്മീ പൂജയില്‍ ജനങ്ങള്‍ പ്രാര്‍ഥിക്കണമെന്നും പത്രം അഭ്യര്‍ഥിക്കുന്നുണ്ട്.
കര്‍ഷക ആത്മഹത്യകളടക്കം ഉള്‍പ്പെടുത്തി കേന്ദ്രസര്‍ക്കാരിനെ കടന്നാക്രമിക്കുന്ന മുഖപ്രസംഗത്തില്‍, ജി.എസ്.ടി, നോട്ടുനിരോധനം തുടങ്ങി കേന്ദ്രസര്‍ക്കാരെടുത്ത മണ്ടന്‍ തീരുമാനങ്ങള്‍ക്കു മറുപടി നല്‍കാന്‍ ജനങ്ങള്‍ തയാറാകണമെന്നും ആവശ്യപ്പെടുന്നുണ്ട്.