ന്യൂഡല്‍ഹി: പാകിസ്താനില്‍നിന്ന് ചികിത്സാര്‍ഥം ഇന്ത്യയിലേയ്ക്കു വരാന്‍ അപേക്ഷ നല്‍കി കാത്തിരിക്കുന്ന എല്ലാവര്‍ക്കും വിസ അനുവദിക്കുമെന്ന് വിദേശകാര്യ മന്ത്രി സുഷമാ സ്വരാജ്. അയല്‍ക്കാര്‍ക്ക് രാജ്യത്തിന്റെ ദീപാവലി സമ്മാനമാണിത്. സുഷമാ സ്വരാജ് ട്വിറ്ററിലൂടെ അറിയിച്ചതാണിക്കാര്യം.

ചികിത്സയ്ക്കായി ഇന്ത്യയിലെത്തുന്നതിനുള്ള പ്രത്യേക വിസയ്ക്കായി കാത്തിരിക്കുന്ന അര്‍ഹരായ എല്ലാവര്‍ക്കും അവരുടെ രേഖകളെല്ലാം പരിശോധിച്ച ശേഷമാണ് വിസ അനുവദിക്കുകയെന്നും സുഷമാ സ്വരാജ് ട്വീറ്റില്‍ വ്യക്തമാക്കുന്നു. ആറു പേര്‍ക്കാണ് വിസ അനുവദിച്ചതെന്ന് റിപ്പോര്‍ട്ടുണ്ട്.

ഇതാദ്യമായല്ല സുഷമ പാകിസ്താനില്‍ നിന്നുള്ളവര്‍ക്ക്് വിസ അനുവദിക്കുന്നത്. ഇന്ത്യയും പാകിസ്താനും തമ്മിലുള്ള ബന്ധം മോശമായ സാഹചര്യത്തില്‍പ്പോലും അവര്‍ വിസ അനുവദിക്കുന്നതില്‍ അമാന്തം വരുത്തിയിരുന്നില്ല.  രാജ്യങ്ങള്‍ തമ്മിലുള്ള പ്രശ്‌നങ്ങള്‍ രോഗികളുടെ യാത്രയെ ബാധിക്കാതിരിക്കുന്നതിന് പ്രത്യേകം ശ്രദ്ധവെച്ചതിലൂടെ നിരവധി തവണ സുഷമാ സ്വരാജ് പ്രശംസിക്കപ്പെടുകയും ചെയ്തിരുന്നു.