കൊച്ചി: ഹൈക്കോടതി വിധി പകര്‍പ്പുകള്‍ പ്രാദേശിക ഭാഷകളില്‍ കൂടി നല്‍കണമെന്ന് രാഷ്ട്രപതി രാംനാഥ് കോവിന്ദ്. കേരള ഹൈക്കോടതി വജ്രജൂബിലി ആഘോഷങ്ങളുടെ സമാപന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
നിലവില്‍ ഇംഗ്ലിഷില്‍ മാത്രമാണ് വിധി. ഇത് മനസിലാക്കാന്‍ സാധാരണക്കാരന് സാധിക്കുന്നില്ല. വിധി എന്തെന്നറിയാന്‍ അഭിഭാഷകനെ സമീപിക്കേണ്ട അവസ്ഥയാണ്. ഇതിന് പരിഹാരം കാണേണ്ടതുണ്ട്.
വിധി പ്രസ്താവിച്ച് 24 മുതല്‍ 36 മണിക്കൂറിനുള്ളില്‍ പ്രാദേശിക ഭാഷകളില്‍ ഉത്തരവ് തര്‍ജ്ജമ ചെയ്ത് നല്‍കണമെന്നും രാഷ്ട്രപതി നിര്‍ദേശിച്ചു. കേസുകള്‍ എത്രയും പെട്ടെന്ന് തീര്‍പ്പാക്കാന്‍ നടപടിയുണ്ടാകണം. സാധാരണക്കാര്‍ ഉറ്റുനോക്കുന്നത് തങ്ങളെയാണെന്ന ബോധം അഭിഭാഷകര്‍ക്കുണ്ടാകണമെന്നും രാഷ്ട്രപതി പറഞ്ഞു.
സുപ്രിംകോടതി ചീഫ് ജസ്റ്റിസ് ദീപക് മിശ്ര, ഹൈക്കോടതി ചീഫ് ജസ്റ്റിസ് നവനീതി പ്രസാദ് സിങ്, കേന്ദ്രമന്ത്രി രവിശങ്കര്‍ പ്രസാദ്, ഗവര്‍ണര്‍ പി.സദാശിവം, മുഖ്യമന്ത്രി പിണറായി വിജയന്‍ തുടങ്ങിയവര്‍ പ്രസംഗിച്ചു. പോസ്റ്റല്‍ വിഭാഗം പുറത്തിറക്കിയ പ്രത്യേക പോസ്റ്റല്‍ കവര്‍ രാഷ്ട്രപതി ചടങ്ങില്‍ പ്രകാശനം ചെയ്തു.