പൂനെ: അധാര്‍ നമ്പര്‍ കൊണ്ടുവരാന്‍ മറന്ന പത്ത് വയസുകാരനെ അധ്യാപിക ക്രൂരമായി മര്‍ദിച്ചതായി പരാതി. മഹാരാഷ്ട്രയിലെ ചിഞ്ച്‌വാഡ മേഖലയിലുള്ള മോര്യ ശിക്ഷാന്‍ സന്‍സ്ത ഹൈസ്‌കൂളില്‍ കുറച്ച് ആഴ്ച്ചകള്‍ക്ക് മുമ്പാണ് സംഭവം.

വിദ്യാര്‍ഥിയുടെ മാതാപിതാക്കളുടെ പരാതിയുടെ അടിസ്ഥാനത്തില്‍ ഇന്നാണ് പൊലിസ് കേസ് രജിസ്റ്റര്‍ ചെയ്തത്.

കുട്ടിയുടെ മുട്ടിന് താഴെ വടികൊണ്ട് അടിക്കുകയായിരുന്നു. മര്‍ദ്ദിച്ച ഭാഗത്ത് ആന്തരിക ക്ഷതം സംഭവിക്കുകയും അണുബാധയുണ്ടാവുകയും ചെയ്തു. അണുബാധയെത്തുടര്‍ന്ന് ഏതാനും ദിവസങ്ങള്‍ക്ക് മുന്‍പ് കുട്ടിയെ ശസ്ത്രക്രിയക്ക് വിധേയമാക്കിയിരുന്നു.

ഇതിന് പിന്നാലെയാണ് പരാതിയുമായി കുട്ടിയുടെ മാതാപിതാക്കള്‍ രംഗത്തെത്തിയത്. കുട്ടിയെ മര്‍ദ്ദിച്ച അധ്യാപികക്കെതിരേ ജുവനൈല്‍ ജസ്റ്റിസ് ആക്ട് പ്രകാരം കേസ് രജിസ്റ്റര്‍ ചെയ്തതായി പൊലിസ് അറിയിച്ചു.