ജലാലാബാദ്: കൂട്ടബലാത്സംഗത്തിനിരയായപതിനാറുകാരി വീട്ടുകാര്‍ ആശുപത്രിയില്‍ എത്തിക്കാത്തതിനെ തുടര്‍ന്ന് രക്തംവാര്‍ന്നു മരിച്ചു. പഞ്ചാബിലെ ഫസീക്ക ജില്ലയിലാണ് സംഭവം.

കുറച്ചു ദിവസങ്ങള്‍ക്ക് മുന്‍പാണ് മൂന്ന് പേര്‍ ചേര്‍ന്ന് കുട്ടിയെ മാനഭംഗപ്പെടുത്തിയത്. എന്നാല്‍ മാനഹാനി ഭയന്ന് വീട്ടുകാര്‍ വിവരം പൊലിസില്‍ അറിയിക്കുകയോ കുട്ടിയെ ആശുപത്രിയില്‍ എത്തിക്കുകയോ ചെയ്തില്ല. സംഭവത്തിനു ശേഷം പെണ്‍കുട്ടിയുടെ ബോധം നഷ്ടപ്പെട്ടിരുന്നു.

സ്‌കൂളിലേക്ക് പോകുന്ന വഴിയെ പെണ്‍കുട്ടിയെ മൂന്ന് പേര്‍ ചേര്‍ന്ന് തട്ടിക്കൊണ്ടുപോയി ബലാത്സംഗത്തിനിരയാക്കുകയായിരുന്നു. ശേഷം പെണ്‍കുട്ടിയെ വഴിയരികില്‍ ഉപേക്ഷിച്ചു. കാണാതായതോടെ അന്വേഷിച്ചെത്തിയ ബന്ധുക്കളാണ് കുട്ടിയെ വീട്ടിലെത്തിച്ചത്.

അന്വേഷണം ഉടന്‍ ആരംഭിക്കുമെന്നും പെണ്‍കുട്ടിയെ പീഡിപ്പിച്ച പ്രതികളെ ഉടന്‍ അറസ്റ്റ് ചെയ്യുമെന്നും പൊലിസ് പറഞ്ഞു. പ്രതികളിലൊരാള്‍ പെണ്‍കുട്ടിയുടെ കൂടെ പഠിക്കുന്നയാളാണെന്നാണ് വിവരം.