തിരുവനന്തപുരം: ജംബോ ഡി.സി.സികള്‍ ഒഴിവാക്കുമെന്ന് മുതിര്‍ന്ന കോണ്‍ഗ്രസ് നേതാവും റിട്ടേണിങ് ഓഫിസറുമായ സുദര്‍ശന്‍ നാച്ചിയപ്പന്‍. പുതിയ കെ.പി.സി.സി അംഗങ്ങളുടെ ആദ്യപൊതുയോഗത്തിനുശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
കെ.പി.സി.സി അംഗത്വ പട്ടികയില്‍ ഉള്‍പ്പെടാതെ പോയവര്‍ നിരാശപ്പെടേണ്ടതില്ല. അവര്‍ക്ക് പാര്‍ട്ടിയില്‍ അര്‍ഹമായ സ്ഥാനം നല്‍കും. പട്ടികയില്‍ കൂടുതല്‍ പുതുമുഖങ്ങളെയും ചെറുപ്പക്കാരേയും ഉള്‍പ്പെടുത്താന്‍ കഴിഞ്ഞതില്‍ സന്തോഷമുണ്ട്. എ.ഐ.സി.സി അംഗങ്ങളേയും കെ.പി.സി.സി പ്രസിഡന്റിനേയും തീരുമാനിക്കേണ്ടത് കോണ്‍ഗ്രസ് ഹൈക്കമാന്‍ഡാണ്. ദേശീയതലത്തില്‍ തെരഞ്ഞെടുപ്പ് പൂര്‍ത്തിയാക്കിയതിന് ശേഷമേ കെ.പി.സി.സിയുടെ പുന:സംഘടിപ്പിച്ച ലിസ്റ്റ് പുറത്തുവിടുകയുള്ളൂവെന്നും നാച്ചിയപ്പന്‍ വ്യക്തമാക്കി.