ദോഹ: ഇറാൻ–അമേരിക്ക സംഘർഷം പശ്ചാത്തലമാക്കി ഗൾഫ് മേഖലയിലെ വ്യോമഗതാഗതം സുരക്ഷാ നിരീക്ഷണത്തിൽ തുടരുന്നതിനിടെ ദോഹയിലെ ഹമദ് അന്താരാഷ്ട്ര വിമാനത്താവളത്തിൽ നിന്നുള്ള വിമാന സർവീസുകൾ നിലവിൽ തുടരുകയാണ്. എന്നാൽ വ്യോമപാതകളിലെ സുരക്ഷാ സാഹചര്യം കണക്കിലെടുത്ത് ചില റൂട്ടുകളിലും സർവീസ് ഷെഡ്യൂളുകളിലും മാറ്റങ്ങൾ വരാൻ സാധ്യതയുണ്ടെന്ന് ഖത്തർ എയർവേയ്സും വ്യോമയാന അധികൃതരും അറിയിച്ചു. 

യാത്രക്കാർ പുറപ്പെടുന്നതിന് മുമ്പ് വിമാനത്തിന്റെ ഏറ്റവും പുതിയ സ്റ്റാറ്റസ് ഖത്തർ എയർവേയ്സിന്റെ ഔദ്യോഗിക വെബ്സൈറ്റ്, മൊബൈൽ ആപ്പ്, അല്ലെങ്കിൽ ബന്ധപ്പെട്ട ട്രാവൽ ഏജൻസികൾ വഴി പരിശോധിക്കണമെന്ന് കമ്പനി നിർദേശിച്ചിട്ടുണ്ട്. വിമാനങ്ങളുടെ സമയക്രമം സുരക്ഷാ, പ്രവർത്തന, നിയന്ത്രണ സാഹചര്യങ്ങൾ അനുസരിച്ച് ഏത് സമയത്തും മാറ്റങ്ങൾക്ക് വിധേയമാകാമെന്നും കമ്പനി അറിയിച്ചു. 

അതേസമയം, അമേരിക്ക–ഇറാൻ സംഘർഷം ശക്തമായതിനെ തുടർന്ന് ഖത്തർ ഉൾപ്പെടെയുള്ള ഗൾഫ് രാജ്യങ്ങളുടെ വ്യോമാതിർത്തികളിലൂടെ സർവീസ് നടത്തുന്നതിൽ യൂറോപ്യൻ യൂണിയൻ ഏവിയേഷൻ സേഫ്റ്റി ഏജൻസി (EASA) വിമാനക്കമ്പനികൾക്ക് പുതുക്കിയ സുരക്ഷാ മുന്നറിയിപ്പ് നൽകിയിട്ടുണ്ട്. ഖത്തർ, യുഎഇ, ബഹ്റൈൻ, കുവൈത്ത്, ഒമാൻ എന്നിവിടങ്ങളിലെ വ്യോമാതിർത്തികളിൽ അധിക ജാഗ്രത പാലിക്കണമെന്നാണ് നിർദേശം. 

ഇതിനിടെ, ഖത്തർ വിദേശകാര്യ മന്ത്രാലയം ഇറാന്റെ ആക്രമണങ്ങളെ ശക്തമായി അപലപിക്കുകയും രാജ്യത്തിന്റെ സുരക്ഷയും പരമാധികാരവും സംരക്ഷിക്കാൻ ആവശ്യമായ എല്ലാ നടപടികളും സ്വീകരിക്കുമെന്ന് വ്യക്തമാക്കുകയും ചെയ്തിട്ടുണ്ട്. 

സംഘർഷം തുടരുന്ന സാഹചര്യത്തിൽ ചില ലക്ഷ്യസ്ഥാനങ്ങളിലേക്കുള്ള സർവീസുകൾ വൈകാനോ റദ്ദാകാനോ സാധ്യതയുള്ളതിനാൽ, യാത്രക്കാർ വിമാനത്താവളത്തിലേക്ക് പുറപ്പെടുന്നതിന് മുമ്പ് വിമാനത്തിന്റെ നിലവിലെ സ്ഥിതി നിർബന്ധമായും പരിശോധിക്കണമെന്ന് അധികൃതർ ആവർത്തിച്ച് ആവശ്യപ്പെട്ടു. 

English summary : Flight operations from Doha's Hamad International Airport are continuing despite heightened tensions between Iran and the United States. However, airlines have warned that some routes and schedules may change depending on the regional security situation. Qatar Airways has advised passengers to check their flight status before travelling through its official website or mobile app.