കുന്നംകുളം: നഗരത്തില്‍ ഹെല്‍ത്ത് സ്‌ക്വാഡിന്റെ മിന്നല്‍ പരിശോധനയില്‍ പഴകിയ ഭക്ഷണ പദാര്‍ഥങ്ങള്‍ പിടിച്ചെടുത്തു.
ഹെല്‍ത്ത് സ്‌ക്വാഡിന്റെ നേതൃത്വത്തില്‍ ഇന്നലെ രാവിലെ നടത്തിയ മിന്നല്‍ പരിശോധനയിലാണ് പഴകിയ ഭക്ഷണ പദാര്‍ഥങ്ങള്‍ പിടിച്ചെടുത്തത്. തൃശൂര്‍ റോഡിലുള്ള സാഗര്‍ ഹോട്ടല്‍, നഗരത്തിലെ മലബാര്‍ ഹോട്ടല്‍ എന്നിവിടങ്ങളില്‍ നിന്നും പഴകിയ പൊരിച്ച കോഴി, ഇറച്ചിക്കറികള്‍, പഴകിയ എണ്ണ എന്നിവ പിടിച്ചെടുത്തു.
കൂടാതെ ബസ് സ്റ്റാന്റിനകത്ത് പുറത്തേക്ക് ഇറക്കിവച്ച് കച്ചവടം ചെയ്തിരുന്ന പഴവര്‍ഗങ്ങള്‍ പിടിച്ചെടുക്കുകയും ചെയ്തിട്ടുണ്ട്. പൊതുജനാരോഗ്യ പ്രശ്‌നങ്ങള്‍ക്കിടയാക്കുന്ന ഹോട്ടലുകളുടെ പ്രവര്‍ത്തനത്തിനെതിരേ കര്‍ശന നടപടിയെടുക്കുമെന്ന് ഹെല്‍ത്ത് സൂപ്രണ്ട് കെ.എസ് ലക്ഷ്മണന്‍ പറഞ്ഞു.
ഹെല്‍ത്ത് ഇന്‍സ്‌പെക്ടര്‍മാരായ സനല്‍കുമാര്‍, ജിതേഷന്‍, ജൂനിയര്‍ ഇന്‍സ്‌പെക്ടര്‍ സജീഷ് പങ്കെടുത്തു.