നെടുമ്പാശ്ശേരി: ഇടപാടുകാരുടെ ബഹളത്തെ തുടര്‍ന്ന് കരിവേലിമറ്റം ചിട്ടീസിന്റെ കുന്നുകര ശാഖ അടച്ചുപൂട്ടി. ചിട്ടിയില്‍ അടച്ച പണം തിരികെ ലഭിക്കാതിരുന്നതിനെ തുടര്‍ന്നാണ് ചിറ്റാളന്മാര്‍ ഓഫിസിലെത്തി ബഹളം വച്ചത്. സംഭവം കൂടുതല്‍ പേര്‍ അറിഞ്ഞതോടെ ഇടപാടുകാരായ നിരവധിപേര്‍ പണം ആവശ്യപ്പെട്ട് രംഗത്തെത്തുകയായിരുന്നു. ഇതോടെ വനിതകള്‍ അടക്കമുള്ള ജീവനക്കാര്‍ ഭീതിയിലായി.
തുടര്‍ന്ന് ചെങ്ങമനാട് പൊലിസ് എത്തി പ്രശ്‌നത്തില്‍ ഇടപെടുകയായിരുന്നു. എസ്.ഐ കെ.ജി.ഗോപകുമാറിന്റെ നേതൃത്വത്തില്‍ ഉടമകളുമായി ബന്ധപ്പെട്ട് നടത്തിയ ചര്‍ച്ചയില്‍ പണം തിരികെ നല്‍കാമെന്ന് സമ്മതിച്ചു. അടുത്ത ശനിയാഴ്ച്ചക്കകം പണം തിരികെ നല്‍കാമെന്നാണ് ഉടമകള്‍ സമ്മതിച്ചിരിക്കുന്നത്. എന്നാല്‍ ഏതാനും പേര്‍ ഇത് അംഗീകരിക്കാന്‍ തയ്യാറായില്ല. ഇവരെ പിന്നീട് കളമശ്ശേരിയിലെ ഹെഡ് ഓഫീസില്‍ വിളിച്ചുവരുത്തി. ഒരു മാസത്തെ കാലാവധിക്ക് ചെക്കുകള്‍ നല്‍കുകയായിരുന്നു.