പേരൂര്‍ക്കട: നിത്യോപയോഗ സാധനങ്ങളുടെ വില പിടിച്ചുനിര്‍ത്താന്‍ ആവിഷ്‌കരിച്ച കണ്‍സ്യൂമര്‍ഫെഡ് പദ്ധതിയായ നന്മ സ്റ്റോര്‍ നിര്‍ത്തലാക്കാനുള്ള തീരുമാനത്തില്‍ നിന്നു സര്‍ക്കാര്‍ പിന്മാറണമെന്നു കെ. മുരളീധരന്‍ എം.എല്‍.എ പത്രക്കുറിപ്പില്‍ ആവശ്യപ്പെട്ടു. കേരളത്തിലെ 14 ജില്ലകളായി 741 നന്മാ സ്റ്റോറുകളാണ് പ്രവര്‍ത്തിക്കുന്നത്. നന്മ സ്റ്റോറുകള്‍ നിര്‍ത്തലാക്കുകവഴി പൊതുവിതരണ രംഗത്തെ വിലക്കയറ്റം പിടിച്ചുനിര്‍ത്തുന്നതിനു പകരം വിലക്കയറ്റം സൃഷ്ടിക്കുന്ന അവസ്ഥയാണ്. നല്ല രീതിയില്‍ പ്രവര്‍ത്തിച്ചു കൊണ്ടിരുന്ന നന്മ സ്റ്റോറുകളില്‍ ആവശ്യത്തിന് സാധനങ്ങള്‍ എത്തിക്കാതെ നഷ്ടത്തിലാക്കുന്ന സമീപനമാണ് സര്‍ക്കാര്‍ സ്വീകരിച്ചിരിക്കുന്നത്. ഈ സാഹചര്യത്തില്‍ വിഷയത്തില്‍ മുഖ്യമന്ത്രി ഇടപെട്ട് പൊതുവിതരണ രംഗം ശക്തിപ്പെടുത്തുകയും കണ്‍സ്യൂമര്‍ഫെഡിനെ സംരക്ഷിക്കുകയും ചെയ്യണമെന്ന് അദ്ദേഹം ആവശ്യപ്പെട്ടു.