പെരിന്തല്‍മണ്ണ: കവര്‍ച്ചാകേസില്‍ അറസ്റ്റ് ചെയ്ത പ്രതിയെ പെരിന്തല്‍മണ്ണയിലെ പ്രത്യേക അന്വേഷണസംഘം കസ്റ്റഡിയില്‍ വാങ്ങി തെളിവെടുപ്പ് നടത്തി. മാസങ്ങള്‍ക്ക് മുന്‍പ് കോഴിക്കോട് കുരുമംഗലം പൊലിസ് അറസ്റ്റ് ചെയ്ത കണ്ണൂര്‍ ആലക്കോട് സ്വദേശി കൊല്ലപ്പറമ്പില്‍ മുഹമ്മദി(37)നെയാണ് പെരിന്തല്‍മണ്ണ ഡിവൈ.എസ്.പി എം.പി മോഹനചന്ദ്രന്റെ നേതൃത്വത്തിലുള്ള പ്രത്യേകസംഘം കസ്റ്റഡിയില്‍ വാങ്ങി തെളിവെടുപ്പ് നടത്തിയത്. പ്രതിയെ ശാസ്ത്രീയ തെളിവുകളുടെ അടിസ്ഥാനത്തില്‍ കൂടുതല്‍ ചോദ്യം ചെയ്തതില്‍ നിന്നും രാമപുരം, കാച്ചിനിക്കാട്, മക്കരപ്പറമ്പ്, അരിപ്ര ഭാഗങ്ങളില്‍ 2015-16 കാലയളവില്‍ നടന്ന വിവിധ കവര്‍ച്ച കേസുകള്‍ക്കും മോഷണശ്രമങ്ങള്‍ക്കും തുമ്പുണ്ടാക്കാന്‍ പൊലിസിന് സാധിച്ചു. കണ്ണൂരില്‍ നിന്ന് രാത്രിയില്‍ ബസ് മാര്‍ഗം ദൂരസ്ഥലങ്ങളില്‍ പോയി നഗരത്തോട് ചേര്‍ന്നുള്ള വീടുകളില്‍ കൂട്ടമായി മോഷണം നടത്തുന്നതാണ് പ്രതിയുടെ രീതി.
ഒരേസമയം അഞ്ചോളം വീടുകളില്‍ കവര്‍ച്ചനടത്തുന്ന പ്രതി ഇതിലൂടെ ലഭിക്കുന്ന പണവും മറ്റും കണ്ണൂരില്‍ കൊണ്ടുപോയാണ് വില്‍പന നടത്തിയിരുന്നത്. കഴിഞ്ഞദിവസം പ്രതിയുമായി പോയി പൊലിസ് 10പവനോളം സ്വര്‍ണം തിരിച്ചെടുത്തു.
പെരിന്തല്‍മണ്ണ സി.ഐ ടി.എസ് ബിനു മൂത്തേടം, മങ്കട എസ്.ഐ സതീഷ്, ഉദ്യോഗസ്ഥരായ സി.പി മുരളീധരന്‍, പി.എന്‍ മോഹനകൃഷ്ണന്‍, എന്‍.ടി ഉണ്ണികൃഷ്ണന്‍, എം.മനോജ്കുമാര്‍, വിദ്യാധരന്‍ എന്നിവരും സംഘത്തിലുണ്ടായിരുന്നു.