ശ്രീനഗര്‍: ഉത്തര കശ്മിരിലെ ഹന്ദ്്‌വാര ജില്ലയില്‍ മഗാം മേഖലയിലുണ്ടായ ഏറ്റുമുട്ടലില്‍ മൂന്ന് ലഷ്‌കര്‍ ഭീകരരെ സൈന്യം വധിച്ചു. കൊല്ലപ്പെട്ട മൂന്നുപേരും പാക് സ്വദേശികളാണെന്ന് സംസ്ഥാന പൊലിസ് മേധാവി അറിയിച്ചു. തിങ്കളാഴ്ച അര്‍ധ രാത്രിയില്‍ തുടങ്ങിയ ഏറ്റുമുട്ടല്‍ ഇന്നലെ രാവിലെ വരെ തുടര്‍ന്നു.
ഇതിനിടയിലാണ് ഭീകരര്‍ കൊല്ലപ്പെട്ടത്. പൊലിസും സി.ആര്‍.പി.എഫും സൈന്യവും സംയുക്തമായിട്ടാണ് ഭീകരര്‍ക്കുവേണ്ടി തിരച്ചില്‍ തുടങ്ങിയത്. ഒരു വീട്ടിനുള്ളില്‍ ഒളിച്ചിരുന്ന ഭീകരരോട് കീഴടങ്ങാന്‍ ആവശ്യപ്പെട്ടെങ്കിലും അവര്‍ സുരക്ഷാ സേനയ്ക്കുനേരെ ആക്രമണം അഴിച്ചുവിടുകയായിരുന്നു. ഇതേ തുടര്‍ന്നാണ് പ്രത്യാക്രമണം നടത്തി മൂന്ന് ഭീകരരെ കൊലപ്പെടുത്തിയത്.