കാഠ്മണ്ഡു: നേപ്പാളില്‍ ചെറുവിമാനം തകര്‍ന്നുവീണ് 16 പേര്‍ക്ക് പരുക്ക്. വടക്കുപടിഞ്ഞാറന്‍ പര്‍വത മേഖലയായ ഹുംല ജില്ലയിലെ സിമികോട്ട് വിമാനത്താവളത്തിലായിരുന്നു സംഭവം.
ഇന്നലെ രാവിലെ ഒന്‍പതിനാണ് വിമാനം തകര്‍ന്നുവീണത്. താരാ എയര്‍ എന്ന ചെറുവിമാനമാണ് അപകടത്തില്‍പ്പെട്ടത്. സുര്‍ഖേതിലേക്കു പുറപ്പെടാനായി റണ്‍വേയില്‍നിന്ന് പറന്നുയരുന്നതിനിടെ വിമാനത്തിന്റെ ചക്രങ്ങള്‍ തകരുകയായിരുന്നു. തുടര്‍ന്ന് വിമാനം റണ്‍വേയില്‍ ശക്തമായി പതിച്ചു. വിമാനത്തിന്റെ മുന്‍ഭാഗം പൂര്‍ണമായി തകര്‍ന്നിട്ടുണ്ട്.
പൈലറ്റ് ബസന്ത ലാമയുടെ തലക്ക് ഗുരുതരമായി പരുക്കേറ്റു. മറ്റു രണ്ടുപേരുടെ നിലയും ഗുരുതരമാണ്. പരുക്കേറ്റവരില്‍ 13 പേര്‍ തെരഞ്ഞെടുപ്പ് ഡ്യൂട്ടിയിലുണ്ടായിരുന്ന പൊലിസ് ഉദ്യോഗസ്ഥരാണ്.