ഷാർജ: ഷാർജയിലെ എല്ലാ പൗരന്മാർക്കും ആരോഗ്യ ഇൻഷുറൻസ് ലഭിക്കുന്ന ഒരു ദിവസം വരുമെന്ന് 'ഡയരക്ട് ലൈൻ' റേഡിയോ പ്രോഗ്രാമിലൂടെ എമിറേറ്റ് ഭരണാധികാരി. ഷാർജ ഗവൺമെന്റ് അതിന്റെ ജീവനക്കാർക്കും അവരുടെ ആശ്രിതർക്കും മുതിർന്ന സ്വദേശികൾക്കും ആരോഗ്യ ഇൻഷുറൻസ് നൽകുന്നുണ്ട്. എന്നാൽ, എമിറേറ്റ് ഈ കവറേജ് വിപുലീകരിക്കുകയാണ്. അടുത്തിടെ, 'വയോജനങ്ങൾക്കുള്ള ഇൻഷുറൻസ്' പദ്ധതിയുടെ പ്രായപരിധി ഷാർജയിൽ കുറച്ചിരുന്നുവെന്നും ഷാർജ ഹെൽത്ത് അതോറിറ്റി(എസ്.എച്ച്‌.എ)യെ ഉദ്ധരിച്ചുള്ള റിപ്പോർട്ടിൽ പറഞ്ഞു. 

'ജനങ്ങൾക്ക് ആരോഗ്യ ഇൻഷുറൻസ് നൽകുന്നതിൽ ഷാർജ വെട്ടികുറച്ചിട്ടില്ല, വെട്ടിക്കുറയ്ക്കുകയുമില്ല. എന്നാൽ, ഞങ്ങൾ വിഷയം സാവധാനത്തിലാണ് എടുക്കുന്നത്'-ഷാർജ ഭരണാധികാരിയും യു.എ.ഇ സുപ്രീം കൗൺസിൽ അംഗവുമായ ശൈഖ് ഡോ.സുൽത്താൻ ബിൻ മുഹമ്മദ് അൽ ഖാസിമി പറഞ്ഞു.

ഇപ്പോൾ 45 വയസുള്ളവർക്ക് ഇൻഷുറൻസ് നൽകുന്നുണ്ട്. അതേസമയം, ഗുണഭോക്താവിനുള്ള യോഗ്യത നേടുന്നതിന്, അവർ യു.എ.ഇ പൗരത്വമുള്ളവരും, എമിറേറ്റിലെ താമസക്കാരും ആയിരിക്കണം -എസ്.എച്ച്.എ മെഡിക്കൽ ഇൻഷുറൻസ് വിഭാഗത്തിലെ ഡോ. മുഹമ്മദ് ഫലാഹ് പറഞ്ഞു. ഈ സ്കീമിന് പുറമേ, എല്ലാ ജീവനക്കാർക്കും നിർബന്ധിത ആരോഗ്യ ഇൻഷുറൻസ് 2025 ജനുവരിയിൽ അവതരിപ്പിക്കാനുള്ള തയാറെടുപ്പിലാണ് ഷാർജ. ദുബൈയിലെയും അബൂദബിയിലെയും എല്ലാ ജീവനക്കാർക്കും ഇതിനകം തന്നെ പ്രാദേശിക നിയന്ത്രണങ്ങളെ അടിസ്ഥാ നമാക്കി മെഡിക്കൽ ഇൻഷുറൻസ് പരിരക്ഷയ്ക്ക് അർഹതയുണ്ടെങ്കിലും, ഷാർജയിലും വടക്കൻ എമിറേറ്റുകളിലും ഇത് ആദ്യമായാണ് ഇത്തരമൊരു നിബന്ധന നടപ്പിലാക്കുന്നത്.

തൊഴിലുടമകൾക്ക് ആനുകൂല്യങ്ങൾ വർധിപ്പിക്കുന്നതിന് ചില സൗകര്യങ്ങൾ നൽകുന്ന അടിസ്ഥാന പാക്കേജ് വികസിപ്പിക്കുന്നതിന് ദുബൈയിലും അബൂദബിയിലും പ്രാദേശിക സർക്കാർ അധികാരികൾ നയങ്ങൾ അവലോകനം ചെയ്യുന്നുണ്ടെന്ന് വിദഗ്ധർ പറഞ്ഞു. ഷാർജയിലെയും വടക്കൻ എമിറേറ്റുകളിലെയും ആരോഗ്യ ഇൻഷുറൻസ് പ്രീമിയങ്ങൾ ദുബൈയിൽ വാഗ്ദാനം ചെയ്യുന്നതിനേക്കാൾ താങ്ങാനാവുന്നതായിരിക്കുമെന്ന് പ്രതീക്ഷി ക്കുന്നുവെന്നും റിപ്പോർട്ടിൽ വ്യക്തമാക്കി.

കൂടുതൽ ഗൾഫ് വാർത്തകൾക്ക് ഈ ഗ്രൂപ്പിൽ ജോയിൻ ചെയ്യുക