തിരൂര്‍: താനൂരിനടുത്ത നിറമരുതൂര്‍ ഉണ്യാലില്‍ നബിദിന റാലിക്ക് നേരെ ക്രിമിനല്‍ സംഘത്തിന്റെ ആക്രമണം. 19 വിദ്യാര്‍ഥികള്‍ ഉള്‍പ്പെടെ 25 പേര്‍ക്ക് പരുക്കേറ്റു.
ഇന്നലെ രാവിലെ പത്തോടെ ഉണ്യാല്‍ മിസ്ബാഹുല്‍ ഹുദ മദ്‌റസ വിദ്യാര്‍ഥികളുടെ നബിദിന റാലിക്ക് നേരെയാണ് ആക്രമണമുണ്ടായത്. റാലി മുക്കാല്‍ മണിക്കൂര്‍ പിന്നിട്ട് തിരിച്ച് മദ്‌റസയിലേക്ക് എത്തുന്നതിനിടെ സി.പി.എം ശക്തി കേന്ദ്രത്തില്‍ വച്ചായിരുന്നു ആക്രമണം.
പ്രദേശത്തെ വീടുകളിലും കെട്ടിടങ്ങളിലും പതിയിരുന്ന സംഘം മാരകായുധങ്ങളുമായി ആക്രമിക്കുകയായിരുന്നു. റാലിയുടെ മുന്നില്‍ അനൗണ്‍സ്‌മെന്റിന് ഉപയോഗിച്ച ഓട്ടോറിക്ഷയും അക്രമികള്‍ തകര്‍ത്തു.
സി.പി.എം പ്രവര്‍ത്തകരാണ് ആക്രമണത്തിന് നേതൃത്വം നല്‍കിയതെന്ന് പരുക്കേറ്റവര്‍ പറഞ്ഞു.
പരുക്കേറ്റ പുത്തന്‍പുരയില്‍ അന്‍സാറിനെ (27) കോഴിക്കോട്ടെ സ്വകാര്യ ആശുപത്രിയില്‍ പ്രവേശിപ്പിച്ചു. പുത്തന്‍പുരയില്‍ അഫ്‌സാദ് (20), പുത്തന്‍പുരയില്‍ അഫ്‌സല്‍ (24), പള്ളിമോന്റെ പുരക്കല്‍ ഫര്‍ഷാദ് (20), പള്ളിമോന്റെ പുരക്കല്‍ സൈദ് മോന്‍ (53), കാക്കാന്റെ പുരക്കല്‍ സകരിയ്യ (28) എന്നിവരെ കോട്ടക്കല്‍ മിംസ് ആശുപത്രിയില്‍ പ്രവേശിപ്പിച്ചു. അഫ്‌സല്‍, അഫ്‌സാദ്, ഫര്‍ഷാദ് എന്നിവര്‍ തീവ്ര പരിചരണ വിഭാഗത്തിലാണ്.
ആക്രമണത്തിനിരയായ മദ്‌റസ വിദ്യാര്‍ഥികളായ റിന്‍ഷാന്‍, മുഹമ്മദ് സിനാന്‍, മുഹമ്മദ് ഉനൈസ്, ആദില്‍, സജാദ്, ഫറാസ്, നിഹാല്‍, അനസ്, സിംസാറുല്‍ ഹഖ്, അസ്‌ലം, റംഷാദ്, ഇര്‍ഫാന്‍, ഫായിദ്, ഷാഹിദ്, ഷമീം, ഫായിസ്, മുഹമ്മദ് ഷഹല്‍, ആദില്‍ഷ, ഫായിസ് എന്നിവരെ തിരൂര്‍ ജില്ലാ ആശുപത്രിയില്‍ പ്രവേശിപ്പിച്ചു.
സംഭവത്തില്‍ പ്രതിഷേധിച്ച് ഇന്ന് താനൂര്‍ മണ്ഡലത്തില്‍ യു.ഡി.എഫ് ഹര്‍ത്താലിന് ആഹ്വാനം ചെയ്തു. കേസ് എടുത്ത് അന്വേഷണം ആരംഭിച്ചതായും പ്രതികളുടെ അറസ്റ്റ് ഉടനുണ്ടാകുമെന്നും താനൂര്‍ പൊലിസ് അറിയിച്ചു.