സുല്‍ത്താന്‍ ബത്തേരി: അതീവ സംരക്ഷണ പ്രാധാന്യ വിഭാഗത്തില്‍പ്പെടുന്ന ഉടുമ്പുമായി അഞ്ചംഗ സംഘം അറസ്റ്റില്‍.
ആലപ്പുഴ ചേര്‍ത്തല സ്വദേശികളായ തങ്കച്ചന്‍(43), ശ്യാംകുമാര്‍(32), അരുണ്‍(29), ഷൈജു(40), വിനോദ്കുമാര്‍(37) എന്നിവരാണ് പിടിയിലായത്.
ഇവര്‍ ഉപയോഗിച്ച കാറും വനംവകുപ്പ് കസ്റ്റഡിയിലെടുത്തു. ചൊവ്വാഴ്ച പുലര്‍ച്ചെ ഒരു മണിയോടെ മൂലങ്കാവില്‍ വച്ചാണ് ഇവരെ പിടികൂടിയത്.
വയനാട് വന്യജീവിസങ്കേതം വാര്‍ഡന്‍ എന്‍.ടി സാജന് ലഭിച്ച രഹസ്യ വിവരത്തിന്റെ അടിസ്ഥാനത്തില്‍ നടത്തിയ അന്വേഷണത്തിലാണ് സംഘത്തെ പിടികൂടിയത്.
പിടിയിലായ തങ്കച്ചന്റെ വീടിന് സമീപത്ത് നിന്നാണ് ഉടുമ്പിനെ ലഭിച്ചതെന്നാണ് ഇവര്‍ പറഞ്ഞതെന്ന് ഉദ്യോഗസ്ഥര്‍ വിശദീകരിച്ചു. വയനാട്ടില്‍ വില്‍പ്പനക്കായാണ് ഉടുമ്പിനെ എത്തിച്ചത്.
അസിസ്റ്റന്റ് വൈല്‍ഡ് ലൈഫ് വാര്‍ഡന്‍മാരായ ആര്‍.കൃഷ്ണദാസ്, വി.അജയ്‌ഘോഷ് എന്നിവരുടെ നേതൃത്വത്തിലാണ് സംഘത്തെ പിടികൂടിയത്. കോടതി ഇവരെ റിമാന്‍ഡ് ചെയ്തു.
കഴിഞ്ഞദിവസം ഇരുതലമൂരി പമ്പുമായി നാലംഗ സംഘത്തെ വനംവകുപ്പ് പിടികൂടിയിരുന്നു.