ദോഹ: 38ാമത് ജിസിസി ഉച്ചകോടിയില്‍ പങ്കെടുക്കാന്‍ കുവൈത്തിലെത്തിയ അമീര്‍ ശെഖ് തമീം ബിന്‍ ഹമദ് അല്‍താനി കുവൈത്ത് അമീര്‍ ശൈഖ് സബാഹ് അല്‍അഹമ്മദ് അല്‍ജാബര്‍ അല്‍സബാഹുമായി കൂടിക്കാഴ്ച നടത്തി. കുവൈത്ത് അമീറിനു പുറമെ കിരീടാവകാശി ശൈഖ് നവാഫ് അല്‍അഹമ്മദ് അല്‍ജാബര്‍ അല്‍സബാഹ്, ദേശീയ അസംബ്ലി സ്പീക്കര്‍ മര്‍സൂഖ് അല്‍ഗാനിം, കുവൈത്ത് നാഷണല്‍ ഗാര്‍ഡ് ഡെപ്യൂട്ടി ചീഫ് ശൈഖ് മിഷാല്‍ അല്‍അഹമ്മദ് അല്‍ജാബര്‍ അല്‍സബാഹ് എന്നിവര്‍ ചേര്‍ന്ന് അമീറിനെ സ്വീകരിച്ചു. 

മേഖലയുടെ സുരക്ഷക്കും സുസ്ഥിരതക്കും ഉച്ചകോടി നിര്‍ണായകമാണെന്ന് ഖത്തര്‍ അമീര്‍ പറഞ്ഞു. സുരക്ഷയ്ക്കും സുസ്ഥിരതയ്ക്കും വേണ്ട സംഭാവനകള്‍ നല്‍കാന്‍ ഉച്ചകോടിക്കാകുമെന്ന പ്രതീക്ഷയും അദ്ദേഹം പങ്കുവച്ചു. എല്ലാ സംഘര്‍ഷങ്ങള്‍ക്കും വെല്ലുവിളികള്‍ക്കുമെതിരായി കൗണ്‍സില്‍ അംഗങ്ങള്‍ ഒന്നിച്ചുനില്‍ക്കേണ്ട സാഹചര്യമാണിപ്പോഴുള്ളതെന്നും മേഖലയിലെ നിലവിലെ സാഹചര്യങ്ങള്‍ അതാവശ്യപ്പെടുന്നുവെന്നും അമീര്‍ കുവൈത്തില്‍ പ്രസ്താവനയില്‍ വ്യക്തമാക്കിയതായി കുവൈത്ത് ന്യൂസ് ഏജന്‍സി റിപ്പോര്‍ട്ട് ചെയ്തു. ഇന്നലെ രാവിലെ കുവൈത്ത് രാജ്യാന്തര വിമാനത്താവളത്തില്‍ പ്രൗഢഗംഭീരമായ വരവേല്‍പ്പാണ് അമീറിന് നല്‍കിയത്.